डंपरच्या चाकाखाली आल्याने दुचाकीस्वाराचा मृत्यू

| पनवेल । वार्ताहर।

पनवेल येथून आपटा येथे जाणार्‍या स्कूटीला डंपरने धडक दिल्याने झालेल्या अपघातात स्कूटीचालक डंपरच्या चाकाखाली आल्याने त्याचा जागीच मृत्यू झाल्याची घटना शनिवारी (दि.03) सायंकाळी मुंबई-गोवा महामार्गावर आपटा फाटा येथे घडली. परशुराम वाघमारे (28) असे या अपघातात मृत्यू झालेल्या दुचाकीस्वाराचे नाव असून, तो आपटा फाटा पनवेल येथील पठारे फार्महाऊस येथे राहत होता.

परशुराम पनवेल येथे आला होता. त्यानंतर सायंकाळी तो पनवेल येथून स्कूटीवरून आपटा फाटा येथे जात असताना आपटा फाटा येथे भरधाव डंपरने त्याच्या दुचाकीला जोराची धडक दिली. या अपघातात परशुराम दुचाकीवरून खाली पडला व डंपरच्या चाकाखाली आल्याने तो गंभीर जखमी होऊन त्याचा जागीच मृत्यू झाला. या अपघातानंतर पनवेल तालुका पोलिसांनी डंपरचालक राजकुमार महातो (37) याच्याविरोधात गुन्हा दाखल करून त्याला ताब्यात घेतले आहे. पुढील तपास पोलीस करीत आहेत.