काम न करता लाखोंची बिले

। ठाणे । प्रतिनिधी ।

मुरबाडमध्ये एक धक्कादायक प्रकार उजेडात आला आहे. धसईजवळील पिंपळघर परे येथे असलेल्या पिंपळेश्‍वर मंदिरात रुपयाचे काम न करता कंत्राटदाराने तब्बल 10 लाखांची बिले ढापण्याचा डाव आखल्याचे समोर आले आहे. संबंधित कागदपत्रेच ठाणे जिल्हा परिषदेच्या बांधकाम विभागात रंगवण्यात आली असल्याची माहिती मिळत आहे. हरिहरसेवा मंडळ व गावकर्‍यांनी याचा भंडाफोड केल्याने देवाला फसवणार्‍यांचे पितळ उघडे पडले आहे. दरम्यान, या घोटाळ्याच्या मास्टरमाईंडचे नाव स्पष्ट झाले नसले तरी या प्रकरणाची सखोल चौकशी करण्याची मागणी ग्रामस्थांनी केली आहे.

मुरबाड तालुक्यात पिंपळघर परे येथे पिंपळेश्‍वर देवस्थान आहे. 25 ते 30 वर्षांपूर्वी येथे भाविकांसाठी एक मठ बांधण्यात आला असून नदीपात्रात शिवमंदिरदेखील उभारले आहे. जीर्ण झालेल्या या वस्तूची गावकरी व देवस्थान मंडळ आपापल्यापरीने दुरुस्तीची कामे करत असत. काही सेवाभावी व्यक्तींनी येथे मठासमोरील अंगणात लोंखडी पत्र्याचे शेडदेखील उभारले आहे. कमिटीने स्वतः खर्च करत पाच ब्रास पेव्हर ब्लॉकचेदेखील काम केले आहे. विशेष म्हणजे आजपर्यंत या देवस्थानाचे सरकारच्या तिजोरीतून एक रुपयाचे देखील काम केले गेले नाही. असे असताना या कामांचे पैसे मिळावे यासाठी ठाणे जिल्हा परिषदेकडे 10 लाखांची बिले अदा करण्याची मागणी करण्यात आली आहे.