दसऱ्यानिमित्त बाजारात तेजीचे वातावरण

दागिन्यांसह वाहन खरेदीची लुट; चारशेहून अधिक दुचाकी आणि शंभरहून अधिक चारचाकी

| रायगड | जिल्हा प्रतिनिधी |

दसऱ्या निमित्त वस्तू खरेदी करणे शुभ मानले जाते. त्यामुळे रायगड जिल्ह्यात दसऱ्यानिमित्त मंगळवारी (दि.20) वेगवेगळ्या वस्तू खरेदीचा उत्साह दिसून आला. यावेळी वाहन, फर्निचर, इलेक्ट्रॉनिक वस्तू यासह सराफ बाजारात जोरदार खरेदीसाठी गर्दी दिसून आली. एका दिवसात चारशेहून अधिक दुचाकी आणि शंभरहून अधिक चारचाकी वाहने खरेदी झाली आहेत. गतवर्षीच्या तुलनेने यंदा दुचाकी खरेदीत काही ठिकाणी 20 टक्क्यांची वाढ तर काही ठिकाणी 20 टक्क्यांनी घट झाल्याचे विक्रेत्यांनी सांगितले. सोन्याच्या किंमती वाढल्या असल्या तरीदेखील सोने खरेदीचा उत्साह कायमच असल्याचे विक्रेत्यांकडून सांगण्यात आले. त्यामुळे बाजारात तेजीचे वातावरण दिसून आले.

नवरात्रौत्सवानंतर दसऱ्याच्या मुहूर्तावर सोने, जागा, घर, वाहन खरेदी करणे शुभ मानले जाते. त्यामुळे दसऱ्याच्या निमित्ताने घरगुतीपासून वेगवेगळ्या प्रकारच्या लहान मोठ्या वस्तू प्रत्येकजण आपआपल्या परीने खरेदी करतात. ही परंपरा यावर्षीही मंगळवारी दिसून आली. ग्राहकांकडून खरेदीवर अधिक भर देण्यातआला. दसऱ्याच्या मुहूर्तावर वेगवेगळ्या लहान मोठ्या वस्तू आपल्या ऐपतीप्रमाणे खरेदी करण्यात आल्या. दुचाकी, चारचाकी तसेच विजेवर चालणाऱ्या उपकरणांसह सोने खरेदीचा उत्साह अधिक दिसून आला. दसऱ्या निमित्त जिल्ह्यातील बाजारपेठांमध्ये सोन्याचे दर वाढले असले तरी काहींनी दसऱ्याच्या मुहूर्तावर लहान मोठे दागीने खरेदी केल्याची माहिती व्यावसायिकांनी दिली. या खरेदीतून करोडोची उलाढाल झाल्याचे सांगण्यात आले.

तसेच, रायगड जिल्ह्यामध्ये वेगवेगळ्या शोरुमध्ये वाहन खरेदीसाठी ग्राहकांची गर्दी दिसून आली. यंदा होन्डा, हिरो शोरुमधून दुचाकी मोठ्या प्रमाणात खरेदी करण्यात आल्या. वाहन खरेदी केल्यावर त्यांना हार घालून, पुजा करून वाहनांसमवेत अनेकांनी सेल्फी व फोटो काढून सोशल मिडीयावर ते व्हायरलदेखील केले. दसऱ्याला नवीन वाहन दारात यावे, यासाठी गेल्या अनेक दिवसांपासून बुकिंग करण्यात आली होती. दसऱ्याच्या मुहूर्तावरही मोठ्या प्रमाणात बुकिंग झाले. यामुळे सर्वच वाहनांच्या शोरुम्समध्ये गर्दी होती. यंदा जिल्ह्यामध्ये 400हून अधिक दुचाकी खरेदी झाल्या असून, शंभरहून अधिक चारचाकी वाहने खरेदी करण्यात आली. गेल्या वर्षीच्या तुलनेने दुचाकी खरेदीत काही कंपन्यांमध्ये यंदा 20 टक्क्याने वाढ तर काही कंपन्यांमध्ये घट झाली असून, दुचाकीपेक्षा चारचाकी विशेष करून कार खरेदीवर ग्राहकांनी कल दिला असल्याचे पहावयास मिळाले. तसेच, पेट्रोलवर चालणाऱ्या दुचाकीला ग्राहकांनी अधिक पसंती दर्शविली असल्याचे विक्रेत्यांनी सांगितले.

त्याचबरोबर ग्राहकांसाठी विविध इलेक्ट्रॉनिक दुकानांत टीव्हीसह इतर विजेवर चालणाऱ्या उपकरणांवर सवलत लागू करण्यात आली होती. त्यामुळे विजेवर चालणाऱ्या वस्तूंच्या खरेदीसाठी देखील बाजारात गर्दी झाली होती. यावेळी काहींनी टीव्ही, फ्रिज आणि एसी सारखे उपकरणे अधिक खरेदी केल्याचे विक्रेत्यांकडून सांगण्यात आले.

नवीन झा, होंडा शोरुम
गतवर्षीच्या तुलनेने यंदा दुचाकी खरेदीवर अधिक भर देण्यात आला. पेट्रोलवर चालणाऱ्या दुचाकीला अधिक मागणी होती. काहींनी रोखीत तर काहींनी कर्जावर वाहन खरेदी केली. वाहन खरेदीसाठी वेगवेगळ्या सवलती ठेवण्यात आल्या होत्या. त्यामुळे ग्राहकांकडून चांगला प्रतिसाद मिळाला. दसऱ्याच्या दिवशी एका दिवसामध्ये साधारणतः होन्डा कंपनीच्या दोनशेहून अधिक दुचाकी खरेदी करण्यात आल्या आहेत.