लोणेरेत भरदिवसा घरफोडी

साडेपाच लाखांचा ऐवज लंपास
| माणगाव | प्रतिनिधी |
माणगाव तालुक्यातील लोणेरे येथील आर्या ग्रीन अपार्टमेंटमध्ये डी विंग तिसर्‍या मजल्यावरील रूम नं.304 या बंद घराचा भरदिवसा कडीकोयंडा तोडून घरात प्रवेश करून अज्ञात चोरट्यांनी घरातील रोख रक्कम व सोन्याचे दागिने असा एकूण 5 लाख 63 हजार रुपयांचा ऐवज लंपास केला आहे. ही घटना सोमवार दि.16 जानेवारी रोजी सकाळी 11 ते दुपारी 2 वाजण्याच्या सुमारास घडली. याबाबतची फिर्याद अनिकेत प्रमोद घोसाळकर (30) यांनी गोरेगाव पोलीस ठाण्यात दिली.

या चोरीत 3 लाख 63 हजार रुपये रोख रक्कम व 2 लाख रुपये किंमतीचा एक सोन्याचा साडेतीन टोळ्यांचा राणीहार व एक सोन्याची सुमारे सहा ग्रॅम वजनाची लेडीज अंगठी जुनी वापरता असा एकूण 5 लाख 63 हजार रुपयांचा ऐवज घेऊन अज्ञात चोरटे फरार झाले आहेत. या घटनेची माहिती समजताच रोहा उपविभागीय अधिकारी माणगाव प्रभारी किरणकुमार सूर्यवंशी व गोरेगाव पोलीस ठाण्याचे सहाय्यक पोलीस निरीक्षक श्रीकृष्ण नावले यांनी घटनास्थळी भेट दिली. या घटनेची नोंद गोरेगाव पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे. या घटनेचा अधिक तपास गोरेगाव पोलीस ठाण्याचे सहाय्यक पोलीस निरीक्षक श्रीकुष्ण नावले यांच्या मार्गदर्शनाखाली पोलीस उपनिरीक्षक प्रमोद काकतकर हे करीत आहेत.