दुचाकीस्वाराला वाचवण्याच्या प्रयत्नात बस कलंडली

। श्रीवर्धन । प्रतिनिधी ।

श्रीवर्धन आगाराच्या बसचा आडी ते म्हसळा मार्गावर अपघात झाला. समोरून वेगाने येणाऱ्या दुचाकीस्वाराला वाचवण्याच्या प्रयत्नात बस रस्त्याच्या कडेला जाऊन कलंडली.

मिळालेल्या माहितीनुसार, शनिवारी (दि.1) सकाळी साडेसहाच्या सुमारास श्रीवर्धन आगाराची आडी बंदर ते आडीमार्गे म्हसळा (एमएच 20 बीएल 3613) ही बस मार्गस्थ होत होती. आडी येथे बस चढावात असताना, समोरून उतारावरून एक दुचाकी वेगाने बसच्या दिशेने आली. यावेळी दुचाकीस्वाराला वाचवण्यासाठी बसचालकाने बस डाव्या बाजूला घेण्याचा प्रयत्न केला. मात्र, बाजूला मोकळी जागा नसल्याने बस रस्त्याच्या कडेला जाऊन कलंडली.

सकाळची पहिलीच फेरी असल्याने आणि बस नुकतीच मार्गावर मार्गस्थ होत असल्याने चालक कोंडीबा वाघमारे व वाहक अनंत शिर्के हे दोघेच बसमध्ये होते. बसमध्ये प्रवासी नसल्याने आणि चालकाच्या समयसूचकतेमुळे मोठा अनर्थ टळला. सुदैवाने अपघातात चालक व वाहक दोघेही सुखरूप आहेत. घटनेची माहिती मिळताच स्थानिक ग्रामस्थ आणि महामंडळाच्या अधिकाऱ्यांनी घटनास्थळी धाव घेतली.