बाबू खानविलकरांसह चौघांविरोधात गुन्हा दाखल

| पोलादपूर | प्रतिनिधी |

महाड विधानसभा निवडणूकीवेळी बहुचर्चित ठरलेले निजामपूर भागातील कार्यकर्ते बाबू खानविलकर आणि त्यांच्या मुलासह अज्ञात चौघांविरोधात पोलादपूर पोलीस ठाण्यात ऍट्रॉसिटी गुन्हा दाखल झाला आहे. अशी माहिती सहायक पोलीस निरिक्षक आनंद रावडे यांनी दिली आहे. याप्रकरणी अद्याप बेपत्ता असलेल्या अपहृताची पत्नी कविता रुपेश मोरे (21) यांनी तक्रार दाखल केली होती.

कविता मोरे हिचे पती रुपेश मोरे व त्यांच्या सोबत असलेले सोनाजी लोकरे व अरविंद काते हे पोलादपूर वनउपज तपासणी नाक्यालगतच्या चहाच्या टपरीवर चहा पित होते. त्यावेळी आरोपी सागर खानविलकर, बाबू खानविलकर आणि अन्य अज्ञात व्यक्तींनी त्यांना जिवे मारण्याच्या उद्देशाने जबरदस्तीने गाडीमध्ये टाकले. यावेळी तुम्ही आमची गाडी पकडुन दिली काय, आता आमचे पैसे दे, असे बोलुन त्यांना भाले येथील एका वाड्यावर नेऊन मारहाण केली. मारहाणीमध्ये अरविंद काते यांच्या डाव्या हाताला गंभीर दुखापत झाली. त्यावेळी रुपेश मोरे हे तेथुन पळुन जात असताना त्याला पकडायला सागरचे सहकारी मागे लागले. त्यानंरत रूपेश मोरे हे अद्याप घरी परतलेले नाहीत.

हा गुन्हा रविवारी (दि.7) रात्री दोन वाजण्याच्या सुमारास ही घटना घडल्यानंतर सागर खानविलकर आणि बाबु खानविलकर तसेच त्यांच्या सोबत असलेल्या सहकाऱ्यांविरोधात गुन्हा दाखल करण्यात आला आहे. याप्रकरणी पोलादपूर पोलीसांनी इ-साक्ष केली असून, या गुन्ह्याचा अधिक तपास तपासिक अंमलदार उपविभागीय पोलीस अधिकारी शंकर काळे यांच्या मार्गदर्शनाखाली पोलीस हवालदार शिंदे हे करीत आहेत.