बीएआरसी उपांत्य फेरीत दाखल
। मुंबई । प्रतिनिधी ।
कांदिवलीतील दादोजी कोंडदेव क्रीडांगणावर जिल्हा अजिंक्यपद निवड चाचणी कबड्डी स्पर्धेचे आयोजन करण्यात आले आहे. बीएआरसीने उपनगरने या स्पर्धेच्या व्यावसायिक गटात उपांत्य फेरी गाठली आहे. तसेच, कुमार गटाच्या पश्‍चिम विभागात पार्ले स्पोर्टस् ‘अ’ ने उपांत्य फेरीत धडक दिली आहे.
बीएआरसीने व्यावसायिक गटात शुभश्री इंटरप्रेजेसचा 19-09 असा पाडाव करीत हा मान मिळविला आहे. सुकेश जगताप, चिराग राणे यांच्या चढाई पकडीच्या सर्वांगसुंदर खेळामुळे हे शक्य झाले. उपांत्य फेरीत त्यांची गाठ साईश्रद्धा सप्लिमेशन संघाशी पडेल. पश्‍चिम विभागीय कुमार गटात पार्ले स्पोर्टस् ‘अ’ ने सह्याद्री क्रीडा मंडळाचा प्रतिकार 38-17 असा सहज मोडून काढत प्रथम उपांत्य फेरी गाठली आहे. आक्रमक सुरुवात करीत 2 लोण देणार्‍या पार्ले संघाने पूर्वार्धात 25-05 अशी आघाडी घेत आर्धे काम फत्ते केले होते. उत्तरार्धात आणखी 13 गुण घेत आपला विजय निश्‍चित केला आहे. ईशांत शिंदे, प्रशांत पवार, अभिषेक यादव यांच्या झंझावाती खेळाने पार्लेकरांना हा मोठा विजय शक्य झाला आहे.
याच गटात उपउपांत्यपूर्व फेरीच्या सामन्यात सिद्धिविनायक ‘अ’ संघाने संघर्ष ‘अ’ संघाला 32-16 असे नमवित उपांत्यपूर्व फेरी गाठली आहे. मध्यांतराला 20-10 अशी आघाडी घेणार्‍या सिद्धिविनायकने नंतर सावध खेळ करीत आपल्या विजयावर शिक्कामोर्तब केले आहे. ओम् कुदळे, साई जाधव यांच्या चतुरस्त्र खेळाने हा विजय साध्य केला आहे. दुसर्‍या सामन्यात जाखमाता मंडळाने रत्नदीप मंडळाचे आव्हान 19-16 असे संपुष्टात आणले. विश्रांतीला 13-05 अशी आघाडी घेणार्‍या जाखमाताला नंतर मात्र विजयासाठी रत्नदीप संघाने चांगलेच झुंजविले होते. विजयी संघाचे दर्शन नाक्ती, अर्पित धनावडे उत्कृष्ट खेळले आहेत. विश्रांतीनंतर सुर सापडलेल्या रत्नदिपच्या रितेश मोरे, सुशांत मेने यांनी संघाचा विजय आवाक्यात आणला होता. पण वेळेचे गणित नजमल्याने त्यांना पराभवाचा सामना करावा लागला.