कृउबाच्या प्रशासकीय कारभारात अनागोंदी

दोषींवर कारवाई कारवाईची मागणी
। नवी मुंबई । प्रतिनिधी ।
नवी मुंबईमधल्या वाशी येथे कृषी उत्पन्न बाजार समितीच्या प्रशासकीय कारभारात प्रचंड स्वरूपात अनागोंदी दिसून येते. माजी मंत्री शशिकांत शिंदे यांचा बोलबाला असणार्‍या या समितीमध्ये ज्या सहसचिवांवर कारवाई व्हायला हवी, त्यांचाच भव्यदिव्य स्वरूपात सत्कार होत असल्याचे विदारक चित्र पाहायला मिळाले.

याबाबत सविस्तर हकीकत अशी की कृषी उत्पन्न बाजार समिती आवारातील शौचालयाच्या सफाई कंत्राटमध्ये करोडो रुपयांचा भ्रष्टाचार झाल्याचे दस्तुरखुद्द मुंबई उच्च न्यायालयाने मान्य केले आहे. सुरेश मारू नामक शौचालय चालविणार्‍या ठेकेदार सुरेश मारू याने आ. शशिकांत शिंदे यांच्यासकट त्यांच्या भ्रष्टाचारी साथीदारांना न्यायालयात खेचले. 5 जानेवारी 2022 रोजी उच्च न्यायालयाने दिलेल्या आदेशानुसार या प्रकरणातील दोषींची चौकशी करून त्यांच्यावर फौजदारी गुन्हे दाखल करण्याचे निर्देश देण्यात आले आहेत. त्या आदेशांचे पालन झाले आहे की कसे याबाबत उच्च न्यायालयाला 20 एप्रिलपर्यंत आढावा देण्यासाठी दंडकदेखील दिलेला आहे.

आमदार शशिकांत शिंदे यांच्यासमवेत आज ज्यांच्यावरती भ्रष्टाचाराचा ठपका ठेवण्यात आला आहे त्यातीलच एक आहेत सहसचिव अविनाश देशपांडे. महाराष्ट्र राज्याचे सहकार व पणनमंत्री बाळासाहेब पाटील यांचे, विशेष कार्य अधिकारी असणारे अविनाश देशपांडे यांच्यावरती 35 लाख रुपयांचा अपहार केल्याचा आरोप सुरेश मारू यांनी केला होता. उच्च न्यायालयाचे निर्देश नुरूप तूर्तास अविनाश देशपांडे यांच्यावर कारवाई अभिप्रेत होती. असे सगळे असले तरी देखील 28 फेब्रुवारी2022 रोजी सहसचिव अविनाश देशपांडे निवृत्त होणार असल्यामुळे त्यांचा भव्य निरोप समारंभ आयोजित करण्यात आला होता.