मुलुंडमध्ये मेट्रो बांधकामादरम्यान स्लॅब कोसळला

एकाचा मृत्यू, चौघे जखमी

| मुंबई | प्रतिनिधी |

मुलुंड (पश्चिम) येथील एलबीएस रोडवर मेट्रो लाईन 4 (ग्रीन लाईन) च्या बांधकामादरम्यान उंचावरील काँक्रीट पॅरापेटचा भाग कोसळून खाली जात असलेल्या ऑटो रिक्षावर आदळल्याने भीषण अपघात झाला. दुपारी सुमारे 12.15 वाजता मुलुंड अग्निशमन केंद्राजवळ, पियर क्रमांक 196 परिसरात ही घटना घडली. अपघातात एकाचा जागीच मृत्यू झाला, तर तीन ते चार जण गंभीर जखमी झाले असून, त्यांच्यावर उपचार सुरू आहेत.

मृत व्यक्तीची ओळख उत्तर प्रदेशातील जौनपूर जिल्ह्यातील सरपंच रामधनी यादव अशी झाली आहे. ते मुंबईत फिरण्यासाठी आले होते. मुलुंडमधून कळव्याकडे लग्नसमारंभासाठी रिक्षाने जात असताना हा अपघात घडला.

दरम्यान, एमएमआरडीएने घटनेची दखल घेत तात्काळ मदतकार्य करण्यात आल्याचे सांगितले. अपघाताचे कारण शोधण्यासाठी स्वतंत्र चौकशी सुरू असून, दोषींवर कठोर कारवाई केली जाईल, असे प्राधिकरणाने स्पष्ट केले. या घटनेवर काँग्रेस खासदार वर्षा गायकवाड यांनी तीव्र प्रतिक्रिया देत सुरक्षेच्या उपाययोजनांवर प्रश्नचिन्ह उपस्थित केले. विकासकामांपेक्षा नागरिकांच्या सुरक्षेला प्राधान्य द्यावे, अशी मागणी त्यांनी केली.