पालिकेच्या निष्काळजी अधिकारी, कर्मचार्‍यांवर गुन्हा दाखल
| नवी मुंबई | प्रतिनिधी |
वाशी सेक्टर-14मधील गोरक्षनाथ पालवे उद्यानामध्ये खेळताना सिद्धार्थ विशाल उघडे (6) या मुलाचा झाकण नसलेल्या पाण्याच्या टाकीमध्ये पडून दुर्दैवी मृत्यू झाला. शनिवारी रात्री घडलेल्या या घटनेप्रकरणी वाशी पोलिसांनी नवी मुंबई महापालिकेच्या वाशी विभागातील उद्यान निरीक्षक, ठेकेदार, सुरक्षारक्षक, तसेच उद्यान विभागाचे अधिकारी, कर्मचारी यांच्याविरोधात निष्काळजीपणाचा गुन्हा दाखल करून तपासाला सुरुवात केली आहे.
सिद्धार्थचे वडील विशाल उघडे हे वाशी सेक्टर-15मध्ये कुटुंबासह राहतात. ते अधूनमधून वाशी सेक्टर-14मधील गोरक्षनाथ पालवे उद्यानामध्ये चालण्यासाठी जात असत. शनिवारी (2) रात्री 8 वाजता ते आपल्या सिद्धार्थसोबत या उद्यानात गेले होते. ते उद्यानात चालत असताना, सिद्धार्थ इतर मुलांसह लपाछपी खेळत होता. खेळताना सिद्धार्थ उद्यानातील झाकण नसलेल्या पाण्याच्या टाकीमध्ये पडला. बराच वेळ झाल्यानंतर सिद्धार्थ दिसत नसल्याने विशाल उघडे यांनी संपूर्ण उद्यानात मुलाचा शोध घेतला, मात्र तो कुठेच सापडला नाही. अखेर उद्यानाच्या कोपर्‍यात असलेल्या उघड्या पाण्याच्या टाकीमध्ये सिद्धार्थ तरंगताना आढळून आला. विशाल यांनी टाकीत उडी मारून सिद्धार्थला बाहेर काढले आणि तात्काळ रुग्णालयात नेले. मात्र, त्याचा मृत्यू झाल्याचे डॉक्टरांनी घोषित केले. या घटनेची माहिती मिळताच वाशी पोलिसांनी घटनास्थळी धाव घेऊन पाहणी केली आणि आकस्मिक मृत्यूची नोंद केली.
उद्यानातील पाण्याची टाकी निष्काळजीपणे उघडी ठेवण्यात आल्याने ही दुर्घटना घडल्याचे आढळून आले आहे. त्यामुळे महापालिकेच्या उद्यान विभागातील कर्मचारी, अधिकारी, ठेकेदार यांना या दुघर्टनेसाठी जबाबदार ठरवून त्यांच्यावर गुन्हा दाखल करण्यात यावा, अशी मागणी रिपाइं पक्षाच्या पदाधिकार्‍यांनी लावून धरली. गुन्हा दाखल झाल्याशिवाय मृत सिद्धार्थवर अंत्यसंस्कार न करण्याची भूमिका कार्यकर्त्यांनी घेतली. अखेर वाशी पोलिसांनी महापालिकेच्या वाशी विभगाचे उद्यान निरीक्षक, ठेकेदार, सुरक्षारक्षक, तसेच उद्यान विभागाचे अधिकारी, कर्मचारी यांच्या विरोधात निष्काळजीपणाचा गुन्हा दाखल करण्यात आला आहे.