शपथविधी सोहळ्यातच काँग्रेसचे आंदोलन

गोव्यात भाजपची कोंडी
| पणजी | वृत्तसंस्था |
गोव्याचे मुख्यमंत्री प्रमोद सावंत यांचा सोमवारी (28 मार्च) शपथविधी होणार आहे.या शपथविधीला पंतप्रधा नरेंद्र मोदी उपस्थित राहणार आहेत. याच शपथविधी सोहळ्यात काँग्रेसने भाजपची कोंडी करण्याचा प्लॅन आखला असून, महागाईच्या विरोधात मोदी यांना जाब विचारला जाणार असल्याचे काँग्रेसने जाहीर केले आहे. निवडणुकांनंतर देशात महागाई वाढत आहे. सर्वसामान्य गोष्टींपासून इंधन आणि आता औषधांच्या किमती देखील वाढल्या आहेत. मागील सहा दिवसांत पेट्रोल, डिझेलच्या दरात प्रतिलिटर 5 रुपयांची वाढ झालीय. तर एलपीजी सिलिंडर 50 रुपयांनी महागला आहे. पाच राज्यांच्या निवडणुका असल्याने सरकारने कोणताही ज्यादाचा भार सर्वसामान्यांवर टाकला नव्हता. मात्र, आता परिस्थिती वेगळी आहे. सीएनजी आणि स्वयंपाकाच्या पाईप्ड नॅचरल गॅसचे दर देखील वधारले आहेत. यामुळे सर्वसामान्य जनतेची होरपळ सुरू आहे. हाच मुद्दा पकडत शपथविधीवेळी काँग्रेस भाजपची कोंडी करण्याच्या प्रयत्नात आहे.

काँग्रेसचे आ. मायकेल लोबो यांनी जनतेला आवाहन केलंय शपथविधीला उपस्थित असणार्‍या नागरिकांनी मोदी आल्यानंतर त्यांना देशातील महागाईचा जाब विचारावा, असं लोबोंनी म्हटलं. यानंतर आता शपथविधीच्या कार्यक्रमात इंधन दरवाढीवरून गोंधळ होण्याची शक्यता बळावली आहे. मायकल लोबो आधीच्या भाजप सरकारमध्ये मंत्री होते. गोव्यात निवडणुका लागण्याआदी त्यांनी काँग्रेसची वाट धरली. यंदा ते कलंगुटमधून विजयी झाले आहेत. पण काँग्रेसच्या नशीबी पराभव आल्याने लोबो आता विरोधी बाकांवर असणार आहेत. इंधन दरवाढीवरून जनतेला त्रास सहन करावा लागत असल्याने लोबोंनी भाजप सरकारवर टीका केली. महागाईची जाणीव मोदींना करून देण्याची गरज आहे, असं ते म्हणाले.