कूपरने वाचवली ऑस्ट्रेलियाची प्रतिष्ठा

| मिरपूर | वृत्तसंस्था |

ऑस्ट्रेलिया क्रिकेट संघाने बांगलादेशविरुद्धच्या तीन सामन्यांच्या वनडे मालिकेतील अंतिम सामना एका विकेटने जिंकून आपली प्रतिष्ठा वाचवली. पहिले दोन वनडे सामने जिंकून बांगलादेशने मालिकेत आधीच 2-0 अशी अभेद्य आघाडी घेतली होती. तिसऱ्या वनडे सामन्यात क्लीन स्वीप करण्याच्या तयारीत होते. प्रथम फलंदाजी करताना बांगलादेशने 50 षटकांत 274 धावा केल्या, ज्याचा पाठलाग ऑस्ट्रेलियाने 9 गडी गमावून आणि तीन चेंडू शिल्लक असताना पूर्ण केला. कूपर कॉनॉलीने 149 धावा करुन फलंदाजीत ऑस्ट्रेलियाच्या विजयात महत्त्वाची भूमिका बजावली.

कूपर कॉनॉलीने बांगलादेशविरुद्धच्या तिसऱ्या वनडे सामन्यात केवळ आपले पहिले शतकच झळकावले नाही, तर तो एका विशेष यादीचा भागही बनला. वनडे क्रिकेटच्या इतिहासात 149 धावांवर बाद होणारा कॉनॉली आता केवळ पाचवा खेळाडू ठरला आहे. कॉनॉलीने या सामन्यात 134 चेंडूंचा सामना करत 13 चौकार आणि 6 षटकार मारले. लक्ष्याचा पाठलाग करताना ऑस्ट्रेलियन संघ नियमित अंतराने विकेट गमावत असताना, कूपर कॉनॉलीने एक बाजू सांभाळत संघाला विजयाकडे स्थिरपणे नेले. मात्र, जेव्हा कॉनॉली 149 धावांवर बाद झाला, तेव्हा ऑस्ट्रेलियाला विजयासाठी आणखी चार धावांची गरज होती आणि ॲडम झाम्पानं चौकार मारुन संघाला विजय मिळवून दिला.