नवदाम्पत्यासाठी ‌‘युगल सुरक्षा’

रायगड डाक विभागाकडून अनोखी भेट

| सारळ | प्रतिनिधी |

सध्या लग्नाचा हंगाम सुरु आहे. त्यानिमिताने नवविवाहित दाम्पत्याला जवळचे लोक वेगवेगळ्या वस्तू भेट देत असतात. काहीवेळेला या वस्तू त्यांच्याकडे अगोदरच असतात, त्यामुळे दांपत्याच्या दृष्टीने निरुपयोगी ठरतात. अशावेळी त्यांना काय भेट द्यावी, हा प्रश्न त्यांच्या नातेवाईकांना, मित्रांना पडू शकतो. यावर रायगड डाक विभागाने ‌‘युगल सुरक्षा’ पॉलिसी सुरू करुन नवदाम्पत्याला अनोखी भेट दिली आहे.

आंबेपूर रायगड डाक विभागात कार्यरत असणाऱ्या मयूर भोईलकर या कर्मचाऱ्याच्या लग्नानिमित्त त्याच्या सहकाऱ्यांनी लग्नाच्या दिवशी भारतीय डाक विभागाच्या युगल सुरक्षा नावाची विमा पॉलिसी काढून त्याचे विमापत्र लग्नात भेट म्हणून देऊन त्यांचे लग्न स्मरणीय केले. सर्वसामन्य जनतेसाठी असणाऱ्या या योजनेची माहिती लोकांना मिळावी, असा उद्देश यापाठीमागे रायगड विभागाकडून साध्य केला गेला. सहकाऱ्यांनी विवाहितांसाठी डाक विभागाकडे असणाऱ्या ही खास विमा पॉलिसी त्यांच्या लग्नात भेट देऊन एक नवीन पायंडा पाडला. याप्रसंगी रायगड डाक अधीक्षक सुनील थळकर, सहाय्यक अधीक्षक सुनील पवार, पोस्टमास्टर गजेंद्र भुसाणे, संतोष चिपळूणकर हजर होते.

लग्नसमारंभात नवविवाहित दाम्पत्याला लग्नाच्या दिवशी या पॉलीसीचा प्रीमियम भरून ती त्याना भेट देता येऊ शकते. एकच पॉलीसी, एकच विमा हप्ता यामधून पती-पत्नीचे एकत्रित विमा संरक्षण या विम्यामधून घेता येत असल्याने याला वैवाहिक विमा ही म्हणता येईल. 20 वर्षे मुदतीसाठी सामायिक वय 21 असलेल्या दाम्पत्यासाठी 1 लाख विम्यासाठी रु 420/- व 40 वर्ष सामायिक वय असलेल्या दाम्पत्यासाठी रु 470/- दरमहा इतका कमी विमा हप्ता भरावा लागतो. मुदतपूर्तीनंतर आताच्या व्याजदराप्रमाणे साधारण दोन लाख 4 हजार रुपये मिळतात.

युगल सुरक्षा म्हणजे विम्याच्या कालावधीत दोघांपैकी एकाचं काही झालं, तर दुसऱ्याला बोनससहित विम्याची पूर्ण रक्कम मिळते. मुदतीमध्ये काही झाले नाही तरीही मुदतपूर्तीनंतर विम्याची पूर्ण रक्कम व बोनस विमाधारकास मिळतो, असे डाक अधीक्षक सुनील थळकर यांनी सांगितले आहे.