सुनील सोनावणे यांच्यावर भ्याड हल्ला

उपविभागीय पोलीस अधिकाऱ्यायांना निवेदन; दोषींवर कठोर कारवाईची मागणी

| वावोशी | प्रतिनिधी |

सामाजिक कार्यकर्ते सुनील सोनावणे आणि मोनिकेत पाटील यांच्यावर झालेल्या कथित जीवघेण्या हल्ल्याच्या निषेधार्थ बौद्ध समाजबांधव, आंबेडकरी अनुयायी, कामगार आणि विविध सामाजिक संघटनांच्या प्रतिनिधींनी खालापूरचे उपविभागीय पोलीस अधिकारी विशाल नेहुल यांना निवेदन देत दोषींवर कठोर कायदेशीर कारवाई करण्याची मागणी केली आहे.

दि.23 जुलै रोजी काही समाजकंटकांनी लोखंडी रॉडसह सुनील सोनावणे व मोनिकेत पाटील यांच्यावर जीवघेणा हल्ला केल्याचा आरोप करण्यात आला आहे. या हल्ल्यात दोघेही गंभीर जखमी झाले असून, त्यांच्यावर उपचार सुरू आहेत. सामाजिक न्यायासाठी कार्यरत असलेल्या कार्यकर्त्यांवर झालेला हा हल्ला केवळ एका व्यक्तीवरील नसून, समाजात भीतीचे वातावरण निर्माण करणारा आणि कायदा-सुव्यवस्थेला आव्हान देणारा प्रकार असल्याचे निवेदनात नमूद करण्यात आले आहे.

खालापूरचे उपविभागीय पोलीस अधिकारी विशाल नेहुल यांना देण्यात आलेल्या निवेदनाद्वारे हल्ल्यातील सर्व आरोपींना तात्काळ अटक करावी, भारतीय न्याय संहिता व इतर लागू कायद्यांनुसार कठोर कारवाई करावी, हल्ल्यामागील सूत्रधार व सहआरोपींचा शोध घेऊन त्यांच्यावरही कायदेशीर कारवाई करावी, पीडितांना आवश्यक कायदेशीर मदत व संरक्षण द्यावे तसेच भविष्यात अशा घटना घडू नयेत यासाठी प्रभावी प्रतिबंधात्मक उपाययोजना कराव्यात, अशा प्रमुख मागण्या करण्यात आल्या आहेत. यावेळी अखिल भारतीय बौद्ध महासंघाचे महाराष्ट्र प्रदेशाध्यक्ष दिलीप मोरे, दीपक खाडे, रिपब्लिकन कार्यकर्ते महेंद्र धनगावकर, गोपीनाथ सोनावणे, अशोक गोतार्णे, सूर्यकांत कांबळे, जतिन मोरे, राकेश गायकवाड, गणेश मोरे, संदीप गायकवाड, पांडुरंग मोरे, जगदीश कांबळे, भगवान यादव, पंकज सोनवणे, दिनेश मोरे, सचिन मोरे, अजित मोरे, दीपक गायकवाड, लक्ष्मण गायकवाड, शिवाजी राठोड, अतिश सोनावणे, रुपेश कांबळे, प्रफुल्ल सोनावळे, शरद थोरात, अजय सोनावणे यांच्यासह छत्तीशी व खालापूर परिसरातील बौद्ध समाजाचे पदाधिकारी, कार्यकर्ते आणि नागरिक उपस्थित होते.