रजनीकांत यांना दादासाहेब फाळके पुरस्कार

नवी दिल्ली | वृत्तसंस्था |
आपल्या अभिनयानं केवळ भारतातीलच नाहीतर जगभरातील चाहत्यांचे लक्ष वेधून घेणार्‍या शिवाजी राव गायकवाड अर्थात रजनीकांत यांना आज दादासाहेब फाळके पुरस्कारानं सन्मानित करण्यात आले. दिल्लीत झालेल्या पुरस्कार सोहळ्यामध्ये त्यांना हा पुरस्कार प्रदान करण्यात आला. सर्वोत्कृष्ट राष्ट्रीय चित्रपट, सर्वोत्कृष्ट अभिनेता, अभिनेत्री, दिग्दर्शक, बालकलाकार, भाषिक चित्रपट या पुरस्कारांचेही यावेळी वितरण करण्यात आले. उपराष्ट्रपती वेंकय्या नायडू यांच्या हस्ते रजनीकांत यांचा गौरव करण्यात आला. यावेळी प्रेक्षकांमध्ये रजनीकांत यांच्या परिवारातील सदस्यही उपस्थित होते.
याबरोबरच अभिनेत्री कंगना राणावत, मनोज वाजपेयी यांनादेखील या सोहळ्यामध्ये सर्वोत्कृष्ट अभिनेत्री आणि अभिनेता या पुरस्कांनी गौरविण्यात आले. हिंदी, तमिळ, कन्नड, मल्याळम अशा विविध भाषांमध्ये अभिनेता म्हणून रजनीकांत यांनी प्रेक्षकांची पसंती मिळवली आहे. आपल्या अनोख्या स्टाईलनं त्यांनी जगभरातील प्रेक्षकांची दाद मिळवली आहे. अशा या प्रचंड लोकप्रिय अभिनेत्याला भारतीय चित्रपट क्षेत्रातील सर्वोच्च पुरस्कारानं गौरविण्यात आल्यानं त्यांच्या चाहत्यांनी त्यांच्यावर अभिनंदनाचा वर्षाव केला आहे.

सावनी रवींद्रला सर्वोत्कृष्ट पार्श्‍वगायिका
गायिका सावनी रवींद्रला बार्डो चित्रपटातील रान पेटलं या गाण्यासाठी ङ्गसर्वोत्कृष्ट पार्श्‍वगायिकाफ पुरस्काराने सन्मानित करण्यात आले. यामुळे तिचे मराठी सिनेसृष्टीत तसेच सर्व गायन क्षेत्रातील कलाकारांकडून प्रचंड कौतुक होत आहे. सावनीची मराठी, हिंदी, तमिळ, तेलुगू, बंगाली, गुजराती अशा विविध भाषेतील गाणी प्रसिद्ध आहेत.