उरण पोलीस ठाण्यात नियुक्तीचा नाट्यमय उलटफेर

तासाभरात बदलली खुर्ची; पदभार स्वीकारताच आदेश बदलल्याने खळबळ

| उरण | प्रतिनिधी |

उरण पोलीस ठाण्याच्या वरिष्ठ पोलीस निरीक्षकपदाच्या नियुक्तीवरून सोमवारी (दि. 29) रात्री घडलेल्या नाट्यमय घडामोडींनी पोलीस वर्तुळासह संपूर्ण उरण तालुक्यात चर्चेला उधाण आले आहे. एका अधिकाऱ्याने अधिकृतपणे पदभार स्वीकारल्यानंतर अवघ्या काही वेळातच त्यांची नियुक्ती रद्द करून दुसऱ्या अधिकाऱ्याला त्याच पदाची जबाबदारी देण्यात आल्याने हा प्रकार पोलीस प्रशासनात अत्यंत दुर्मिळ मानला जात आहे.

उरणचे वरिष्ठ पोलीस निरीक्षक हनिफ मुलाणी यांची सहाय्यक पोलीस आयुक्तपदी बढती झाल्यानंतर हे पद रिक्त झाले होते. त्यानंतर पृथ्वीराज घोरपडे यांची उरणच्या वरिष्ठ पोलीस निरीक्षकपदी नियुक्ती करण्यात आली. त्यांनी पोलीस ठाण्यात हजर होत अधिकृतपणे पदभारही स्वीकारला. मात्र, अवघ्या काही वेळातच संपूर्ण घडामोडींना अनपेक्षित कलाटणी मिळाली.

पोलीस मुख्यालयातून नव्याने आदेश प्राप्त झाल्यानंतर घोरपडे यांच्या नियुक्तीत बदल करण्यात आला आणि त्यांच्या जागी जगदीश शेलकर यांची वरिष्ठ पोलीस निरीक्षक म्हणून नियुक्ती करण्यात आली. त्यानंतर रात्री उशिरा शेलकर यांनी उरण पोलीस ठाण्याचा पदभार स्वीकारला. पोलीस अधिकारी व कर्मचाऱ्यांनी त्यांचे स्वागत करत नवीन जबाबदारीसाठी शुभेच्छा दिल्या.

या अभूतपूर्व घडामोडीमुळे विविध चर्चांना उधाण आले आहे. पदभार स्वीकारल्यानंतर इतक्या कमी वेळात आदेशात बदल का करण्यात आला? प्रशासकीय स्तरावर नेमके काय घडले? पूर्वीचा आदेश मागे घेण्यामागे कोणते कारण होते? या प्रश्नांची अधिकृत उत्तरे अद्याप समोर आलेली नसल्याने तर्क-वितर्कांना अधिकच खतपाणी मिळत आहे.

दरम्यान, जगदीश शेलकर यांच्यासाठी उरण हा नवीन कार्यक्षेत्र नाही. यापूर्वी त्यांनी येथे सेवा बजावल्याने स्थानिक परिस्थिती, सामाजिक प्रश्न आणि गुन्हेगारीचे स्वरूप त्यांना परिचित आहे. मात्र, गेल्या काही वर्षांत उरणचा चेहरामोहरा झपाट्याने बदलला आहे. वाढता औद्योगिक विकास, जेएनपीए परिसरातील वाढती वर्दळ, जमिनींचे कोट्यवधी रुपयांचे व्यवहार, संघटित गुन्हेगारी, अवैध धंदे आणि कायदा-सुव्यवस्थेची वाढती आव्हाने लक्षात घेता त्यांच्या खांद्यावर मोठी जबाबदारी असणार आहे.

उरणकरांच्या अपेक्षा आता नव्या वरिष्ठ पोलीस निरीक्षकांकडून वाढल्या आहेत. अवैध धंद्यांवर प्रभावी कारवाई, संघटित गुन्हेगारीवर अंकुश, नागरिकांचा पोलीस प्रशासनावरील विश्वास अधिक दृढ करणे, वाहतूक व कायदा-सुव्यवस्था सुरळीत राखणे आणि वाढत्या शहरीकरणाच्या पार्श्वभूमीवर प्रभावी पोलीसिंग उभारणे, या सर्व आघाड्यांवर जगदीश शेलकर यांची खरी कसोटी लागणार आहे. दरम्यान, तासाभरात बदललेले नियुक्ती आदेश हे उरणच्या पोलीस इतिहासातील चर्चेचा विषय ठरले असून, या निर्णयामागील कारणांचा उलगडा होणार का, याकडे आता सर्वांचे लक्ष लागले आहे.