रायगड जिल्ह्याच्या जिल्हाधिकारी पदी ‘यांची’ वर्णी

। अलिबाग । विशेष प्रतिनिधी ।

रायगड जिल्ह्याचे जिल्हाधिकारी डॉ. महेंद्र कल्याणकर यांची कोकण विभागीय आयुक्त म्हणून नियुक्ती झाल्यानंतर त्यांच्या रिक्तपदी नवे जिल्हाधिकारी म्हणून डॉ. योगेश म्हसे यांची नियुक्ती करण्यात आली आहे. डॉ योगेश म्हसे हे म्हाडाचे कार्याधिकारी म्हणून कार्यरत होते. तसेच मार्केटिंगचे महाव्यवस्थापक म्हणून देखील त्यांनी काम पाहिले आहे. एक धडाकेबाज अधिकारी म्हणून ओळख असणाऱ्या योगेश म्हसे यांची भिवंडी निजामपूर मनपा आयुक्त, पिंपरी प्राधिकरणाचे मुख्य कार्यकारी अधिकारी म्हणून त्यांची कारकीर्द विशेष गाजली होती.

डॉ. योगेश म्हसे यांनी त्यांच्या कार्यकाळात भिवंडीत विविध सामाजिक उपक्रम पार पाडले. करवसूली, अनधिकृत बांधकाम आदि कारवायांमुळे ते विशेष चर्चेत आले. त्यांच्याविरोधात राजकिय पुढारीदेखील दुखावले गेले होते. त्यामुळे त्यांच्या बदलीची मागणी अनेक पक्षाच्या पदाधिकार्‍यांनी वरिष्ठांकडे केली होती. आता रायगड जिल्ह्याचा कारभार स्वीकारल्यानंतर ते कशाप्रकारे काम करणार, प्रलंबित प्रश्‍न कसे सोडविणार, याकडे मात्र सर्वांचे लक्ष लागून राहिले आहेत.