धुक्यांमुळे वातावरण प्रफुल्लित

प्रवासी, पर्यटक घेत आहेत धुक्याचा आनंद

। पाली/गोमाशी । वार्ताहर ।

परतीच्या पावसाला सुरुवात झाली असून जिल्ह्यात मागील काही दिवसांपासून पहाटे सर्वत्र धुक्यांची दुलई पसरत आहे. या मनमोहक धुक्यांमुळे वातावरण प्रफुल्लित होत आहे. डोंगराळ भागात जणू ढगच खाली उतरल्याचा भास होत आहे. प्रवासी व पर्यटकसुद्धा या धुक्यांचा व मनोहारी वातावरणाचा आनंद घेत आहेत.

जिल्ह्यात मागील काही दिवसांपासून सर्वत्र दाट धुक्याची दुलई पसरत आहे. याशिवाय डोंगरावर विशेषतः ताम्हिणी घाटात पांढर्‍या शुभ्र व करड्या रंगांचे ढग दाटत आहेत. जणू काही येथे स्वर्गच असल्याचा भास होत आहे. विमान प्रवास करतांना विमानातून दिसणार्‍या ढगांचा अनुभव येथे मिळत आहे. यातच आजूबाजूला पसरलेल्या गर्द हिरवाईने हा अद्भुत नजारा आणखीच बहारदार होतो. यामुळे येथून प्रवासी व पर्यटकसुद्धा ढग, हिरवाई व धुक्याचा आनंद घेत आहेत. तसेच, हे धुकेमय वातावरण ट्रॅकिंग व पर्यटनासाठी उत्तम असल्यामुळे बरेचसे ट्रेकर व पर्यटक किल्ले, डोंगर, समुद्रकिनारा आदी ठिकाणी भटकंतीसाठी येत आहेत.

किल्ल्यांवर प्रफुल्लित वातावरण
रायगड, सुधागड, सरसगड, मानगड, सुरगड, मृगगड, विश्रामगड, कर्नाळा, आदींसह जिल्ह्यातील इतरही उंचावरील किल्ल्यांवर ढग व धुके पसरत आहेत. यामुळे येथे येणारे दुर्गप्रेमी व ट्रेकर्स दुर्गभ्रमंती बरोबरच ढगांची व धुक्याची अनुभूती घेतात. ताजे व प्रफुल्लित करणारे हे वातावरण सर्वांनाच आकृष्ट करत आहे. यामुळे जिल्ह्यात पर्यटनवृद्धी होतांना दिसत आहे.

ट्रेकिंगसाठी हे वातावरण उत्तम आहे. यामुळे विकेंडला ट्रेकिंगचा बेत करतो. डोंगरावर पसरलेले ढग व धुक्यामुळे जिल्ह्यातील वातावरण खूप अल्हाददायक झाले आहे. पहाटे व सकाळी आवर्जून या ढगांचा आणि येथील निसर्ग सौंदर्याचा मनमुराद आनंद लुटत आहे. ताम्हिणी घाटात उतरलेले ढग व हिरवाई प्रचंड आकर्षित करीत आहे.

– मॅकमोहन हुले, ट्रेकर व गिर्यारोहक