। मुंबई । प्रतिनिधी ।
मुंबई आणि पुणे मेट्रोसाठी सरकारने निधी जाहीर केला आहे. मात्र, जाहीर झालेल्या निधीमध्ये मुख्यमंत्री एकनाथ शिंदे आणि अर्थमंत्री अजित पवार यांनी सांगितलेल्या आकड्यांत तफावत आहे, असा आरोप राष्ट्रवादी (शरदचंद्र पवार) पक्षाचे आ. जितेंद्र आव्हाड यांनी केला आहे. तसेच, खरं काय ते सांगा असेही आव्हाड म्हणाले आहेत.
सोशल मिडीयावर पोस्ट करत जितेंद्र आव्हाड म्हणाले की, खरे काय ते सांगा? मुख्यमंत्री आणि राज्याचे अर्थमंत्री यांच्या आकड्यात तफावत आहे. मुख्यमंत्री यांनी दिलेल्या आकडेवारीनुसार एमयूटीपी प्रकल्पांसाठी 511.48 कोटी मिळाले आहेत. तर, अर्थमंत्री अजित पवार यांनी दिलेल्या माहितीनुसार एमयूटीपी 3 साठी 1465 कोटी 33 लाख रुपये मिळाले आहेत. मुंबई मेट्रो साठी 1255 कोटी मिळाले असे मुख्यमंत्री यांनी सांगितले आहे. तर, अजित पवार यांनी दिलेल्या माहितीनुसार मुंबई मेट्रोसाठी 1673 कोटी 41 लाख देण्यात आले आहेत. पुणे मेट्रोसाठी 699 कोटी मिळाले असे मुख्यमंत्री यांनी सांगितले आहे. तर, पुणे मेट्रोसाठी 837 कोटी मिळाल्याचे अजित पवार यांनी सांगितले आहे. मुख्यमंत्र्यांच्या आकडेवारीनुसार इंटिग्रेटेड ग्रीन अर्बन मोबिलिटी प्रकल्प मुंबईसाठी 792.35 कोटी मिळाले आहेत. तर, अजित पवार यांच्या आकडेवारीनुसार 652 कोटी 52 लाख मिळाले आहेत. नेमके किती पैसे देण्यात आले आहेत, असा सवाल जितेंद्र आव्हाड यांनी विचारला आहे.