उत्पादन शुल्क विभाग ॲलर्ट मोडवर

अवैध हातभट्टी, बनावट मद्याविरोधात धडक मोहीम

| रायगड | जिल्हा प्रतिनिधी |

पिंपरी-चिंचवड येथे घडलेल्या विषारी दारू दुर्घटनेत अनेकांचा मृत्यू झाल्यानंतर राज्यभरातील उत्पादन शुल्क यंत्रणा ॲलर्ट मोडवर आली आहे. या घटनेचे गांभीर्य लक्षात घेऊन रायगड जिल्ह्यातील राज्य उत्पादन शुल्क विभागाने अवैध हातभट्टी, बनावट देशी-विदेशी मद्यनिर्मिती, विक्री आणि वाहतुकीविरोधात व्यापक धडक मोहीम सुरू केली आहे.

जिल्हाभरात अनेक ठिकाणी छापे टाकून हातभट्ट्या उद्ध्वस्त करण्यात आल्या असून, गेल्या दहा दिवसांत मोठ्या प्रमाणात कारवाई करण्यात आली आहे. या मोहिमेदरम्यान लाखो रुपयांचा मुद्देमाल जप्त करण्यात आला असून, 122 जणांना ताब्यात घेण्यात आले आहे. या कारवाईमुळे अवैध मद्य व्यवसाय करणाऱ्यांमध्ये मोठी खळबळ उडाली आहे.

पिंपरी-चिंचवड येथील विषारी दारू प्रकरणानंतर संपूर्ण राज्यात सतर्कता वाढविण्यात आली आहे. रायगड जिल्ह्यातील राज्य उत्पादन शुल्क विभागानेही तातडीने हालचाली सुरू करत हातभट्टीच्या दारू अड्ड्यांचे समूळ उच्चाटन करण्यासाठी कडक पावले उचलली आहेत. जिल्हाभरात कारवाईची तीव्रता वाढविण्यात आली असून, नागरिकांनाही अवैध मद्यनिर्मिती अथवा विक्रीबाबत माहिती असल्यास ती तात्काळ विभागाला देण्याचे आवाहन करण्यात आले आहे.

राज्य उत्पादन शुल्क विभागाचे अधीक्षक रविकिरण कोले यांच्या मार्गदर्शनाखाली विशेष पथकांनी जिल्ह्यातील विविध भागांत धाडसत्र सुरू केले आहे. अवैध मद्यनिर्मिती, विक्री आणि तस्करीविरोधात राबविण्यात आलेल्या विशेष मोहिमेत आतापर्यंत 180 गुन्हे दाखल करण्यात आले आहेत. त्यापैकी 17 हून अधिक गुन्हे बेवारस स्वरूपाचे आहेत. या कारवाईत 122 जणांना अटक करण्यात आली आहे.

धाडसत्रादरम्यान दोन हजार 249 लीटर हातभट्टीची दारू जप्त करण्यात आली असून, 84 हजार 494 लीटर रसायन नष्ट करण्यात आले आहे. याशिवाय 93.78 बल्क लीटर देशी मद्य, 6.69 बल्क लीटर विदेशी मद्य आणि 15.57 बल्क लीटर बिअर जप्त करण्यात आली आहे.

परराज्यातून रायगडमध्ये आणण्यात आलेले 104.3 बल्क लीटर मद्यही ताब्यात घेण्यात आले आहे. जिल्ह्यातील निरा व ताडी विक्रेत्यांवरही विशेष लक्ष ठेवण्यात येत असून, बनावट निरा आणि ताडी विक्री करणाऱ्यांवर कारवाई करण्यात आली आहे. या मोहिमेत 313 लीटर निरा, 151 लिटर ताडी आणि 270 किलो काळा गूळ जप्त करण्यात आला आहे. अवैध मद्य वाहतुकीसाठी वापरण्यात येणारी वाहनेही जप्त करण्यात आली आहेत. या सर्व कारवाईत लाखो रुपयांचा मुद्देमाल ताब्यात घेण्यात राज्य उत्पादन शुल्क विभागाला यश आले आहे.

राज्य उत्पादन शुल्क विभागाची विविध पथके जिल्ह्यातील प्रमुख रस्त्यांवर सातत्याने गस्त घालत असून ग्रामीण, डोंगराळ आणि जंगल परिसरातील गावठी व हातभट्टीच्या दारू व्यवसायावर आळा घालण्यासाठी विशेष मोहीम राबविण्यात येत आहे. अवैध मद्यनिर्मितीचे अनेक अड्डे दुर्गम भागात असल्याने तेथे पोहोचणे आव्हानात्मक ठरत असले तरी स्थानिकांच्या सहकार्याने अशा ठिकाणांवर थेट धाडी टाकून अड्डे उद्ध्वस्त करण्यात आले आहेत. उत्पादन शुल्क विभागाच्या या व्यापक कारवाईमुळे जिल्ह्यातील अवैध मद्य व्यवसायाला मोठा फटका बसल्याचे चित्र आहे.

प्रतिबंधात्मक कारवाईचा इशारा
अवैध दारू विक्री, वाहतूक आणि निर्मिती करणाऱ्यांविरोधात रायगडच्या राज्य उत्पादन शुल्क विभागाने आणखी कठोर भूमिका घेतली आहे. ज्या व्यक्तींविरोधात दोन ते तीन गुन्हे दाखल आहेत, त्यांच्याविरोधात प्रतिबंधात्मक कारवाई करण्यात येणार आहे. महाराष्ट्र दारूबंदी कायद्यातील कलम 93 अंतर्गत संबंधितांकडून प्रतिज्ञापत्र लिहून घेण्याची प्रक्रिया सुरू करण्यात आली असून पुनरावृत्ती रोखण्यासाठी विशेष लक्ष दिले जात आहे.