गटशेतीच्या माध्यामातून सुरण लागवडीचा प्रयोग

शेतकर्‍यांना एकत्र येऊन शेती करण्याचा पहिलाच प्रयत्न
। तळा । वार्ताहर ।
तळा तालुक्यातील चरई खुर्द गौळवाडी येथे तालुका कृषी अधिकारी तळा आत्मा यंत्रणेच्या माध्यमातून नाविन्यपूर्ण बाबी अंतर्गत सुरण लागवडीचा प्रकल्प खरीप 2022 मध्ये घेण्यात येत आहे. येथील जय हनुमान सेंद्रिय शेतकरी गटाच्या माध्यमातून 20 ते 25 शेतकर्‍यांना एकत्र करून हा प्रकल्प राबविण्यात येत आहे.भात पिकाबरोबर वरकस जमिनीवर हा प्रकल्प घेऊन शेतकर्‍यांना अधिकचे उत्पादन मिळवून देणे हा या प्रकल्पाचा मुख्य उद्देश असून तालुक्यांमध्ये शेतकर्‍यांना एकत्र करून गटाच्या माध्यमातून शेती करण्याचा हा पहिलाच प्रयत्न आहे.

या प्रकल्पामध्ये शेतकर्‍यांना डॉ. बाळासाहेब सावंत कोकण कृषी विद्यापीठ दापोली यांनी विकसित केलेल्या गजेंद्र या वाणाचे सुरण कंद अनुदानावर मोफत देण्यात आले आहेत. मशागत, खते व इतर खर्च गटाच्या माध्यमातून शेतकरी स्वतः करणार आहेत. त्याचबरोबर शेतकर्‍यांना लागवड ते काढणी व विक्री पर्यंतचे तंत्रज्ञान अवगत होण्यासाठी शेतीशाळेचे देखील आयोजन करण्यात येत आहे. शेतीशाळेमध्ये 6 ते 7 वर्गाच्या माध्यमातून मार्गदर्शन करण्यासाठी कृषी विज्ञान केंद्र रोहा येथील शास्त्रज्ञ डॉ. राजेश मांजरेकर सर हे मार्गदर्शन करणार आहेत.

सुरण हे कंदवर्गीय पीक असल्याने त्याचे आहारामध्ये आयुर्वेदिक महत्त्व खूप आहे. तसेच शहरामध्ये मोठ्या प्रमाणावर मार्केट देखील उपलब्ध आहे. त्यामुळे एकाच ठिकाणी जवळजवळ 2 ते 3 एकर क्षेत्रावर हा प्रयोग करण्याचा निर्णय घेण्यात आला. हा प्रयोग यशस्वी झाल्यास आपण भात शेती सोबत वरकस जमिनीवर शेतकर्‍यांना पर्यायी पीक उपलब्ध करून देऊ शकतो. तसेच गटशेतीच्या माध्यमातून शेती करण्याचा आदर्श आपण तालुक्यातील इतर शेतकर्‍यांना देऊ शकतो. अशी माहिती तालुका कृषी अधिकारी आनंद कांबळे यांनी दिली. हा प्रकल्प यशस्वी करण्यासाठी सागर वाडकर मंडळ कृषी अधिकारी, सचिन जाधव कृषी पर्यवेक्षक, महानंदा नागुरे कृषी सहाय्यक व सचिन लोखंडे तालुका तंत्रज्ञान व्यवस्थापक आत्मा हे करीत आहेत.