मंत्री उदय सामंत यांच्या वक्तव्याने खळबळ
| नागपूर | प्रतिनिधी |
राज्यात गेल्या वर्षी सत्तांतर झाले तेव्हा शिवसेनेने आपल्या आमदारांना व्हीप बजावले होते. व्हीप बजावल्याच्या सह्यासुद्धा आमदारांकडून घेतल्या होत्या. मात्र, आपण कोणत्याही ठिकाणी सही केलेली नाही. आपल्याला दाखविण्यात आलेल्या कागदावरील सही आपली नाहीच असे खळबळजनक विधान शिंदे गटाचे मंत्री उदय सामंत यांनी सुनावणीत केले आहे. त्यामुळे शिंदे गटाच्या आमदारांच्या खोट्या सह्या करण्यात आल्या काय, अशी चर्चा सुरू झाली आहे.
शिवसेनेच्या आमदारांच्या अपात्रेतेसंदर्भातील सुनावणी सध्या हिवाळी अधिवेशनात विधानसभेचे अध्यक्ष राहुल नार्वेकर यांच्यासमक्ष सुरू आहे. यात सोमवारी सामंत यांची साक्ष नोंदविण्यात आली. उद्धव ठाकरे गटाचे वकील वरिष्ठ अधिवक्ता देवदत्त कामत यांनी यावेळी सामंत यांची उलटतपासणी घेतली. या कागदावरील आपल्या नावावर केलेले हस्ताक्षर हे आपले आहे का, असा प्रश्न विचारला असता सामंत यांनी, ही सही माझी नाही, हे हस्ताक्षर माझे नाही, असे उत्तर दिले. तसेच कागदपत्रामध्ये 2022 च्या पक्षादेश क्रमांक दोनवर आपण तो स्वीकारल्याची ही पोचपावती आहे हे खरे आहे का, असा प्रश्न विचारला असता, मी कोणत्याही कागदावर सही केली नाही, मी व्हीप स्वीकारलेला नाही आणि त्या कागदावरील सही माझी नाही, असे उत्तर सामंत यांनी दिले.
वर्षा बंगल्यावर शिवसेनेच्या विधीमंडळाच्या बैठका झाल्या. या बैठकांमध्ये सदस्यांच्या यादीचा कागद देण्यात आला. त्यावर आम्ही सह्या केल्या हे खरे आहे. मात्र, तेव्हा या कागदांच्या वरच्या भागावर काहीच छापील लिहिलेले नव्हते. साक्षी दरम्यान दाखविण्यात आलेल्या कागदावर हस्ताक्षराने बैठकीबाबत लिहिण्यात आले आहे. त्यामुळे आमच्याकडून अगाऊ सह्या घेण्यात आल्या अशा आशयाची साक्ष यावेळी लांडे यांनी यापूर्वी दिली आहे.