कर्जत–मुरबाड मार्गावर भीषण अपघात; दुचाकीची गायीला धडक, एक ठार तर एक गंभीर

| नेरळ | प्रतिनिधी |

कर्जत–मुरबाड राष्ट्रीय महामार्गावर झालेल्या भीषण अपघातात एका तरुणाचा मृत्यू झाला असून दुसरा गंभीर जखमी झाला आहे. जखमीवर रायगड उपजिल्हा रुग्णालयात उपचार सुरू आहेत. दुचाकीची रस्त्यात आलेल्या गायीला धडक बसल्याने हा अपघात घडल्याची माहिती समोर आली आहे. अपघातग्रस्त तरुण लोभेवाडी जवळील फोंडेवाडी येथील रहिवासी असल्याचे समजते.

कर्जत तालुक्यातील कर्जत–कशेळे–मुरबाड या राज्यमार्गावर आंबिवली फाटा परिसरात शनिवारी सायंकाळी साडेपाच वाजण्याच्या सुमारास हा अपघात घडला. फोंडेवाडी येथील हरिचंद्र ढोले (वय 25) आणि मालू ढोले (वय 48) हे दोघे कशेळे येथून कर्जतच्या दिशेने दुचाकीवरून निघाले होते. हरिचंद्र ढोले यांच्या पत्नीला कर्जत येथील रायगड उपजिल्हा रुग्णालयात बाळ झाले होते. त्या बाळाची विचारपूस करण्यासाठी ते दोघे कर्जतला जात होते.

आंबिवली फाटा परिसरातील उतारावरून जात असताना अचानक रस्त्यात गाय आल्याने दुचाकी चालकाचा ताबा सुटला आणि एमएच 46 एटी 1930 क्रमांकाची हिरो होंडा सुपर स्प्लेंडर ही दुचाकी गायीच्या वासराला जाऊन धडकली. या धडकेत भीषण अपघात होऊन मालू ढोले यांचा जागीच मृत्यू झाला. तर हरिचंद्र ढोले यांच्या डोक्याला गंभीर दुखापत झाली.
अपघातानंतर जखमी हरिचंद्र ढोले यांना तातडीने कशेळे ग्रामीण रुग्णालयात नेण्यात आले. तेथे डॉक्टरांनी प्राथमिक उपचार करून टाके घालत पुढील उपचारासाठी त्यांना हलविण्याचा निर्णय घेतला. मात्र कशेळे ग्रामीण रुग्णालयातील ॲम्ब्युलन्स सेवा बंद असल्याने जखमी रुग्णाला हलविण्यात अडचणी निर्माण झाल्या.

दरम्यान, डॉ. झेंडे यांनी तात्काळ खांडस आणि आंबिवली येथील रुग्णवाहिकांशी संपर्क साधून ॲम्ब्युलन्स मागवली. त्यानंतर जखमीला पुढील उपचारासाठी रायगड उपजिल्हा रुग्णालयात हलविण्यात आले असून त्यांच्यावर उपचार सुरू आहेत. या अपघातामुळे परिसरात हळहळ व्यक्त करण्यात येत आहे.