करंजाडेतील रहिवासी इमारतीखालील गॅस दुकानाला भीषण आग

33 एलपीजी सिलेंडर सुरक्षित बाहेर काढले
अग्निशमन दलाच्या तत्परतेमुळे मोठी दुर्घटना टळली

। पनवेल । प्रतिनिधी ।

पनवेलजवळील करंजाडे सेक्टर-02, आर-1 परिसरातील सावित्री निवास इमारतीखाली असलेल्या गॅस शेगडी दुरुस्तीच्या दुकानाला गुरुवारी (दि.14) सकाळी भीषण आग लागली. दुकानात मोठ्या प्रमाणात एलपीजी गॅस सिलेंडर असल्याने संभाव्य स्फोटाचा धोका निर्माण झाला होता. मात्र, अग्निशमन दलाच्या तातडीच्या आणि शर्थीच्या प्रयत्नांमुळे मोठी दुर्घटना टळली.

अग्निशमन विभागाकडून मिळालेल्या माहितीनुसार, सकाळी 10.40 वाजण्याच्या सुमारास केनी यांनी पनवेल अग्निशमन केंद्रात फोन करून करंजाडे आर-1, प्लॉट क्रमांक 148, सेक्टर-02, कॉलेज फाटा येथील दुकानाला आग लागल्याची माहिती दिली. आगीची माहिती मिळताच अग्निशमन वाहन तातडीने घटनास्थळी रवाना करण्यात आले. घटनास्थळी पोहोचल्यावर सावित्री निवास इमारतीच्या तळमजल्यावरील गॅस शेगडी दुरुस्तीच्या दुकानाला मोठ्या प्रमाणात आग लागल्याचे दिसून आले. दुकानात असलेल्या ज्वलनशील साहित्यामुळे काही क्षणांतच आगीने रौद्र रूप धारण केले. काळ्या धुराचे लोट इमारतीच्या वरच्या मजल्यांपर्यंत पोहोचल्याने रहिवाशांमध्ये भीतीचे वातावरण निर्माण झाले. नागरिकांनी जीव वाचवण्यासाठी तातडीने इमारतीबाहेर धाव घेतली. तर स्थानिक तरुणांनी प्रसंगावधान राखत वृद्ध नागरिक, महिला आणि लहान मुलांना सुरक्षित बाहेर काढण्यासाठी मदत केली. अग्निशमन जवानांनी होज लाइन आणि होज रिलच्या साहाय्याने पाण्याचा मारा करत आग विझवण्याचे काम सुरू केले. मात्र आग अधिक तीव्र असल्याने मदतीसाठी कळंबोली अग्निशमन केंद्राचे वाहन तसेच नवीन पनवेल अग्निशमन केंद्राचे वाहन घटनास्थळी बोलावण्यात आले.

अग्निशमन दलाच्या संयुक्त प्रयत्नांनंतर सुमारे तासाभराच्या अथक प्रयत्नांनी आग आटोक्यात आणण्यात यश आले. त्यानंतर घटनास्थळी कुलिंग प्रक्रिया करण्यात आली. तपासादरम्यान दुकानातून मोठ्या प्रमाणात एलपीजी सिलेंडर आढळून आले. त्यामध्ये पाच मोठे, तेवीस मध्यम आकाराचे आणि पाच लहान सिलेंडरचा समावेश होता. सर्व सिलेंडर तातडीने बाहेर काढून कळंबोली येथील कॅम्पर वाहनामधून सुरक्षितरीत्या अग्निशमन केंद्रात हलविण्यात आले.

या भीषण आगीत दुकान पूर्णपणे जळून खाक झाले असून इमारतीचेही मोठ्या प्रमाणात नुकसान झाले आहे. सुदैवाने कोणतीही जीवितहानी झाली नसल्याने नागरिकांनी सुटकेचा निश्वास सोडला. आगीचे नेमके कारण अद्याप स्पष्ट झाले नसले तरी शॉर्ट सर्किटमुळे आग लागल्याचा प्राथमिक अंदाज व्यक्त करण्यात येत आहे.