मयत व्यक्तीचे बनावट आधार व पॅन कार्ड बनवून फसवणूक; खांदेश्वर पोलीस ठाण्यात गुन्हा दाखल

। नवीन पनवेल । वार्ताहर ।
वावंजे येथील मयत व्यक्तीच्या नावाचे बनावट आधार कार्ड, पॅनकार्ड बनवून त्या आधारे खरेदीखत केले व खरेदीखत नावावर करून घेण्याच्या मोबदल्यात अभिजित पांडुरंग पाटील यांच्याकडून रक्कम स्वीकारली. फसवणूक केल्याप्रकरणी खांदेश्वर पोलीस ठाण्यात रघुनाथ चंद्रराव कदम, भरत दशरथ पाटील, दिलीप अर्जुन पाटील, शाकीर शाबेर सिद्दिकी व मोहम्मद हरून ए खान यांच्याविरोधात गुन्हा दाखल करण्यात आला. वावंजे येथील राघो हरी पाटील यांचे आजोबा गणपत हरी पाटील यांचा 1952 साली मृत्यू झाला आहे. पाटील यांनी जुलै 2017 मध्ये तलाठी सजा वावंजे यांच्याकडून जमिनीचा सातबारा काढला होता. यावेळी जमीन त्यांचे आजोबा गणपत हरी पाटील यांचे नावे असल्याचे दिसून आले. सदरची जमीन अनिल पाटील, कैलास पाटील व अनिता पाटील यांच्या नावावर करून देण्यासाठी 2021 मध्ये सातबारा उतारा काढला असता उतार्‍यावर त्यांचे आजोबा गणपत हरी पाटील यांच्याऐवजी अभिजीत पांडुरंग पाटील (आपटा) यांचे नाव दिसून आले. याबाबत खातरजमा करण्यासाठी त्यांनी रजिस्ट्रेशन कार्यालयात चौकशी केली. 2019 मध्ये आजोबा गणपत हरी पाटील म्हणून त्रयस्थ व्यक्तीचा फोटो व कोपरखैरणे येथील पत्ता असल्याचे समजले. त्यांच्याकडून ही जमीन अभिजीत पांडुरंग पाटील (आपटा) यांनी विकत घेतल्याचे नमूद आहे. 5 जणांनी बनावट आधार कार्ड, पॅन कार्ड बनवून खरेदीखत बनवले व त्या मोबदल्यात अभिजित पाटील यांच्याकडून पैसे घेऊन फसवणूक केली. या प्रकरणी पाच जणांविरुद्ध खांदेश्वर पोलीस ठाण्यात गुन्हा दाखल करण्यात आला.