डोलवी ग्रामपंचायतीच्या आजी-माजी सरपंचावर फसवणुकीचा गुन्हा

| पेण | प्रतिनिधी |
पेण तालुक्यातील आर्थिकदृष्टया संपन्न असणाऱ्या डोलवी ग्रामपंचायतीच्या (आजी-माजी) सरपंचावर फसवणुकीचा गुन्हा वडखळ पोलीस ठाण्यात दाखल झाला आहे. गेल्या सहा महिन्यांपासून समाजमाध्यमांवर मोठया प्रमाणात डोलवी ग्रामपंचायतीच्या भ्रष्टाचाराबाबत माहिती फिरत होती. मात्र ठोस कारवाई होत नव्हती. 1 डिसेंबर 2023 रोजी उच्च न्यायालयाकडून शासनाच्या अधिकाऱ्यांवर ताशेरे ओढून तातडीने कारवाईचे आदेश आल्यानंतर अधिकारीवर्ग खडबडून जागा झाला आणि शुक्रवार 8 डिसेंबर रोजी रात्री उशिरा गटविकास अधिकारी भाऊ साहेब पोळ यांनी वडखळ पोलीस ठाण्यात तत्कालीन सरपंच वनिता अनिल म्हात्रे, विद्यमान सरपंच परशुराम तुकाराम म्हात्रे आणि ग्रामसेवक दिनेश मोहोरकर यांच्या विरुध्द गुन्हा नोंदविला आहे.

गटविकास अधिकाऱ्यांनी सांगितलेल्या माहितीनुसार सन 2019-20 ते दिनांक 31 मार्च 2023 या कालावधीत ग्रामपंचायत डोलवी येथील तत्कालीन सरपंच वनिता अनिल म्हात्रे, ग्रामसेवक दिनेश मारुती मोहोरकर यांनी ग्रामपंचायत ग्रामनिधीतील एकुण 21 लाख 61 हजार 852 रुपये रकमेचा संगनमताने अपहार केला. विद्यमान सरपंच परशुराम तुकाराम म्हात्र व ग्रामसेवक दिनेश मारुती मोहोरकर यांनी खावटी खरेदीच्या 85 किटसपैकी 7 किटसचा अपहार केला. त्याची प्रत्येकी नगाप्रमाणे किंमत 8 हजार 931 एकुण किंमत 62 हजार 517 अशी रक्कम संगनमताने अपहार करून तिघांनी मिळुन शासनाची फसवणुक केली. याबाबत वडखळ पोलीस ठाण्यात गुन्हा दाखल झाला असून पोलीस निरिक्षक तानाजी नारनवर यांच्या मार्गदर्शनाखाली पोलीस उपनिरिक्षक अभिजीत पाटील अधिकचा तपास करत आहेत.