गायकर यांच्या बैलगाडीने कोरले ढालीवर नाव

। खांब । वार्ताहर ।

रोहा तालुक्यातील धानकान्हे हौशी बैलगाडी संघटनेच्यावतीने जिल्हास्तरीय बैलगाडी शर्यतीचे आयोजन करण्यात आले होते. या शर्यतीत फायनल गटात उडदवणे येथील संतोष गायकर यांची बैलगाडी पहिली येऊन मानाच्या ढालीवर आपले नाव कोरले आहे.

यावेळी, उपसरपंच सूरज कचरे यांच्या हस्ते स्पर्धेला प्रारंभ करण्यात आला असून स्पर्धेवेळी पांडुरंग कचरे, महादेव माहित, डॉ. बालाजी वाखरकर, शाम लोखंडे, दयाराम भोईर, नितिन कचरे, राकेश थळकर, रमेश गोवर्धने, चंद्रकांत लहाने, कमलेश शिंदे, निलेश कचरे, सुदाम जाधव, ज्ञानेश्‍वर जाधव, भाई कचरे, नामदेव देवकर आदी प्रमुख मान्यवर उपस्थित होते.

या स्पर्धेत संपुर्ण जिल्ह्यातून जवळपास शंभर बैलगाडी चालक व मालक यांनी उत्स्फूर्तपणे सहभाग नोंदवून या स्पर्धेची चूरस वाढविली होती. तर, स्पर्धेतील फायनल गटात अहमद पठाण (श्रीगाव) आणि राक्षिकर बंधू (नवखार) यांनी अनुक्रमे द्वितीय व तृतीय क्रमांक पटकावले आहे. फायनल गट व अन्य गटातील विजेत्यांना उपस्थित मान्यवरांच्या हस्ते आकर्षक पारितोषिके देऊन गौरविण्यात आले.