शासकीय विश्रामगृह टाकणार कात

मुरूडमधील सा.बां. 5 वर्षानंतर आला 60 लाखांचा निधी

। मुरुड जंजिरा । सुधीर नाझरे |

मुरुड शहराचा परिसर निसर्गरम्य असल्याने जगातून पर्यटक मुरूडला भेट देतात. नवाब काळापासून मुरूड शहराची रचना सुंदर आहे. शासकीय कार्यालये समुद्रकिनारी आहेत. शासनाची तीन विश्रामगृहे आहेत.

सार्वजनिक बांधकाम विभाग, वनविभाग व जिल्हापरिषद अशी विश्रामगृहे समुद्रकिनारी असल्याने इमारतीच्या पायरीला समुद्राचे पाणी स्पर्श करते. म्हणूनच पर्यटक, शासकीय अधिकारी व परदेशी पाहुणे या विश्रामगृहात राहायला मिळेल अशी वाट पाहतात. परंतु कोविड काळात विश्रामगृह आरोग्य विभागाला वर्ग केल्याने 5 वर्षात त्याची कोणतीही दुरुस्ती झाली, नसल्याने विश्रामगृहाची अतिशय वाईट परिस्थिती झाली होती. नुकताच शासनाचा 60 लाख रूपयांचा निधी प्राप्त झाल्याने दुरुस्तीच्या कामाला सुरूवात झाली आहे.

प्रवेशद्वारावर काटेरी झाडांचे जंगले तयार झाली होती. चार वर्षापूर्वीच नूतनीकरण करून 2 वातानुकूलित कक्ष व 3 साधे कक्ष बनवण्यात आले. त्यानंतर मुरूडला झालेल्या वादळात पत्रे उडून गेल्याने नवीन केलेल्या कामाचे मोठे नुकसान झाले. नुकतेच आरोग्य विभागाने त्यांचे साहित्य विश्रामगृहातून नेल्याने विश्रामगृह सा.बां.खात्याकडे वर्ग केले आहे. सा.बां. विभागाने विश्रामगृह नूतनीकरणासाठी 80 लाखांचा प्रस्ताव पाठवल्याची माहिती अभियंता माने यांनी दिली होती. 5 वर्षानंतर फक्त 60 लाख रूपयांचा निधी आल्याने इमारत दुरुस्तीचे काम सुरु झाले आहे. फर्निचरसाठी पुन्हा निधी मागवणार असल्याचे अजित सांगळे यांनी सांगितले.

विश्रामगृहाची दुरवस्था होण्याची करणे

1. 2020 साली आलेले तुफानी वादळात पत्रे उडाल्याने नवीनच केलेले फर्निचर भिजले व खराब झाले.

2. पत्रे टाकून इमारत दुरुस्त केली. तोच कोरोना सुरु झाल्याने पुन्हा कोविड कारणांसाठी इमारत तहसिलदारांनी आरोग्य विभागाकडे दिली.

3. कोरोना काळात 15 दिवस रूग्ण राहिले असतील. नंतर इमारत पूर्ण रिकामीच राहिली. कोविडमुळे इमारतीत प्रवेश नसल्याने इमारतीची दुर्दशा झाली

4. कोविड संपला पण अधिकार्‍यांच्या निरुत्साहामुळे इमारतीतील कोविडचे साहित्य हटवण्यात 2 वर्ष गेली. त्यात इमारतीचे मोठे नुकसान झाले.कक्ष वर्षभरत उघडलाच नाही. आत काय झाले असले हे पाहणे औत्सुक्याचे.

सार्वजनिक बांधकाम खात्याचा 60 लाख निधी आल्याने दुरुस्तीचे काम सुरु आहे.6 महिन्यात काम पूर्ण करण्याची मुदत आहे. आतील कामाचा नवीन प्रस्ताव देणार आहे.

अजित सांगळे,
सार्वजनिक बांधकाम खाते अधिकारी

आम्ही 2019 साली मुरुडला आलो होतो. त्यावेळी सार्वजनिक बांधकाम खात्याच्या विश्रामगृहात राहिलो होतो.हे रेस्टहाऊस इतके सुंदर आहे कि, याच्या गॅलरीत उभे राहिले तर जगातील सुंदर सूर्यास्त पाहायला मिळतो.सूर्यास्त पाहताना थंडगार वारा हवाहवासा वाटतो. आज मी पुन्हा मुरुडला आलो पहिले तर पूर्ण वाईट परिस्थती आहे.

मनीष खटावकर,
पर्यटक