। चिरनेर । वार्ताहर ।
22 ऑक्टोबर ते 22 डिसेंबरमध्ये मुदत संपणार्या सुमारे 7649 ग्रामपंचायतीच्या आणि नव्याने स्थापित झालेल्या ग्रामपंचायतींच्या निवडणुका घेण्यासाठी राज्य निवडणूक आयोगाने तयारी सुरू केली आहे. त्यामध्ये उरणमधील 18 ग्रामपंचायतींच्या निवडणुका देखील या टप्प्यात होणार आहेत. त्या अनुषंगाने मतदार याद्या बनविण्याचे काम सुरू झाले आहे. या मतदार याद्यांमध्ये 31 मे 2022 रोजी प्रसिद्ध केलेली विधानसभेची मतदार यादी गृहीत धरण्यात येणार आहे.
13 ऑक्टोबर रोजी प्रभाग निहाय यादी प्रसिद्ध करण्यात येईल. त्यावर हरकती मांडण्यासाठी 13 ते 18 ऑक्टोबर हा कालावधी ठरविण्यात आला आहे. प्रभाग निहाय अंतिम यादी शुक्रवार (दि.21) प्रसिद्ध करण्यात येईल. पाणजे, डोंगरी, घारापुरी, रानसई, सारडे, पुनाडे, धुतूम, नवीन शेवा, करळ, कळंबूसरे, बोकडवीरा, वशेणी, पागोटे, पिरकोन, जसखार, चिरले, भेंडखळ आणि नवघर या ग्रामपंचायतींच्या निवडणुका घेतल्या जाणार आहेत. साधारणतः नोव्हेंबर ते डिसेंबर अखेरपर्यंत निवडणुका होण्याची शक्यता जाणकारांकडून वर्तवली जात आहे.