बेरोजगारांसाठी मार्गदर्शन शिबीर

जे. एम म्हात्रे चॅरिटेबल संस्थेचा पुढाकार
। पनवेल । वार्ताहर ।
कोरोना काळात बर्‍याच नागरीकांच्या नोकर्‍या गेल्या व्यवसाय ठप्प झाले अशा परिस्थितीतही गेल्या पाच ते सहा महिन्यापासून स्वतःला सावरत प्रत्येक नागरीक पुन्हा उभा राहण्याचा प्रयत्न करत आहे. अशा परिस्थितीत आपणही काहीतरी करायला पाहिजे या उद्देशाने जे.एम.म्हात्रे चॅरिटेबल संस्था आणि लक्ष्यपूर्ती वेलफेअर फेडरेशन यांच्या संयुक्त विद्यमाने रविवारी (दि.8) सकाळी दहा वाजता आद्य क्रांतिवीर वासुदेव बळवंत फडके नाट्यगृह, पनवेल येथे व्यवसाय आणि अर्थसहाय्य मार्गदर्शन शिबिराचे आयोजन करण्यात आले आहे.

या शिबिरामध्ये केंद्र शासनाच्या अंतर्गत येणार्‍या खादी आणि ग्रामोद्योग आयोग च्या माध्यमातून जे कोर्सेस आहेत त्यांपैकी काही ठराविक कोर्सेसची विस्तृतपणे माहिती त्या विभागातील अधिकार्‍यांच्या मार्फत मिळणार आहे. ते कोर्स झाल्यानंतर आपल्या व्यापाराला चालना देण्यासाठी राष्ट्रीय लघु उद्योग महामंडळ आणि इंडियन चेंबर ऑफ इंटरनॅशनल बिझनेसच्या तज्ञ मंडळींकडून आपल्याला मार्गदर्शन मिळणार आहे. तसेच यावेळी केंद्र आणि राज्य शासनाच्या सबसिडी कर्जपुरवठा करते वेळी बँकांचे काही नियम असतात त्या नियमांविषयी आपल्याला सहकार्य करण्यासाठी बँक ऑफ इंडिया, बँक ऑफ बडोदा, रायगड जिल्हा मध्यवर्ती बँकचे अधिकारी उपस्थित राहणार आहे. जेणेकरून आपल्याला नव्याने सुरू करणारा व्यवसायासाठी भांडवल उपलब्ध होण्यास सहज सोपे होईल.

पनवेलमध्ये प्रथमच एका छत्राखाली केंद्र सरकारचे विविध कोर्सेसची माहिती देण्यासाठी संबंधित विभागातील अधिकारी येणार आहेत. तसेच कोर्स पूर्ण झाल्यावर आवश्यक ते परवाने काढण्यासाठी सहकार्य सुद्धा आम्ही देणार आहोत. हे शिबीर युवक, महिला आणि तृतीयपंथी अशा प्रत्येक स्तरातील नागरिकांसाठी मोफत आयोजित करण्यात आलेले आहे. – प्रितम जनार्दन म्हात्रे, अध्यक्ष जे.एम.म्हात्रे चॅरिटेबल संस्था