अबब! पाऊण किलोचा आंबा

बागायतदार डॉ. जगन्नाथ पाटील यांचे सर्व स्तरातून कौतुक

| खारेपाट | महेंद्र म्हात्रे |

अलिबाग तालुक्यातील प्रसिद्ध आंबा बागायतदार डॉ. जगन्नाथ पाटील यांच्या बागेत सुमारे 669 ग्रॅम वजनाचा हापूस आंबा सापडला असून, त्यांचे सर्व स्तरातून कौतुक होत आहे. महत्त्वाचे म्हणजे, आंतरराष्ट्रीय बाजारपेठ, एफएमसी मार्केट नवी मुंबई वाशी येथील व्यापारी तसेच विविध क्षेत्रातील मान्यवर मंडळी व रायगड जिल्ह्यातील आंबा बागायतदार यांच्याकडूनही अभिनंदन होत आहे.

रायगड जिल्ह्यातील प्रसिद्ध आंबा बागायतदार व आंबा उद्योजक स्वर्गीय मारुती नागू पाटील मारुती मास्तर यांचे अलिबाग तालुक्यासह रायगड जिल्ह्यात हापूस आंब्याचे उत्पादन चांगल्या प्रकारे घेण्यास मोलाचे योगदान आहे. त्यांच्या निधनानंतर त्यांचे संपूर्ण कुटुंबीय चांगल्या प्रकारे कार्यरत असून, उद्योग व्यवसायात प्रगती केली आहे. गेली अनेक वर्षे एफएमसी मार्केट नवी मुंबई वाशी येथे ट्रकच्या ट्रक भरून हापूस आंब्याची निर्यात होत होती. मात्र, 2022 ते 2025 दरम्यान बदलते हवामान, अवकाळी पाऊस यामुळे हापूस आंब्याच्या निर्यातीत सुमारे 60 टक्के तूट झाल्याने अलिबाग तालुक्यासह रायगड जिल्ह्यातील आंबा बागायतदारांना मोठे नुकसान सहन करावी लागत आहे0 विशेष म्हणजे हापूस आंब्याचे उत्पादन तीस ते पस्तीस टक्क्यांनी घसरले आहे.

हापूस आंब्याचे चांगले उत्पादन घेण्यासाठी औषधे, खते, फवारणी, मनुष्यबळ यांच्यावर मोठा खर्च होतो, तसेच कमी उत्पादनामुळे मोठा फटका आंबा बागायतदारांना सहन करावा लागत आहे. मात्र, भविष्यात अशी स्थिती निर्माण झाल्या आंबा बागायतदारांवर भीषण संकट वाढवण्याची शक्यता त्यांनी व्यक्त केली. यासंदर्भात जिल्हा प्रशासन कृषी विभाग, संबंधित खात्याचे मंत्री तसेच शासनाने योग्य ती दखल घेणे गरजेचे आहे. तसेच अचानक पडलेल्या पावसामुळे आंबा बागायतदारांना आर्थिक सहकार्य मिळणे गरजेचे आहे, अशी मागणी जोर धरत आहे.