दोन दुचाकींची समोरासमोर धडक; एक ठार

। रेवदंडा । प्रतिनिधी ।

रेवदंडा पोलीस ठाण्याच्या हद्दीत एक अत्यंत धक्कादायक घटना घडली आहे. एका दुचाकीस्वाराने बेदरकारपणे आणि अतिवेगाने वाहन चालवल्यामुळे घडलेल्या भीषण अपघातात, एका 63 वर्षीय ज्येष्ठ शेतकऱ्याला आपला जीव गमवावा लागला आहे. या घटनेमुळे स्थानिक रहिवाशांमध्ये तीव्र संताप व्यक्त होत आहे.

रेवदंडा पोलीस ठाण्याकडून मिळालेल्या माहितीनुसार, मधुकर हरिभाऊ पाटील रा. मिठेखार, ता. मुरुड हे मंगळवारी (दि. 28) रात्री आपल्या हीरो सुपर स्प्लेंडर दुचाकीवरून चणेरा येथील कराराने घेतलेल्या आंब्याच्या बागेची पाहणी करून मिठेखारकडे परत येत होते. ते कुटुंबातील मुख्य भरणकर्ते असून, शेती-बागायती हा त्यांचा प्रमुख व्यवसाय होता. दरम्यान, समोरून येणारा पवन चौधरी रा. शिरगाव हा होंडा शाईन दुचाकीवर तिघांना बसवून विरुद्ध दिशेने आणि अतिवेगाने वाहन चालवत येत होता. निष्काळजीने वाहन चालवताना त्याने मधुकर पाटील यांच्या दुचाकीला समोरून जोरदार धडक दिली.

या भीषण धडकेत मधुकर पाटील गंभीर जखमी झाले. त्यांना तात्काळ जवळच्या रुग्णालयात दाखल करण्यात आले; मात्र उपचारादरम्यान त्यांचा मृत्यू झाला. मधुकर पाटील हे शांत स्वभावाचे आणि मेहनती शेतकरी म्हणून परिसरात ओळखले जाणात होते. त्यांच्या अकाली मृत्यूमुळे कुटुंब शोककळा कोसळली आहे.

या प्रकरणी मधुकर पाटील यांचा मुलगा प्रथमेश पाटील यांनी रेवदंडा पोलीस ठाण्यात तक्रार दाखल केली. पोलीस उपनिरीक्षक दीपक जानू म्हशीलकर यांच्या नेतृत्वाखाली गुन्हा दाखल करण्यात आला आहे. अपघातातील आरोपी पवन चौधरी देखील जखमी असून, त्याच्यावर उपचार सुरू आहेत. पोलीस तपास अधिक गतीने करत असून, आरोपीवर कडक कारवाई करण्यात येईल.

बेफिकीर चालकांना इशारा
रेवदंडा-मुरुड परिसरात दररोज विरुद्ध दिशेने, अतिवेग आणि ओव्हरलोडिंगमुळे असे अपघात घडत आहेत. पोलीस अधिकाऱ्यांनी दिलेल्या माहितीनुसार, "रस्ता हा सर्वांचा आहे. नियमांचे पालन न करणाऱ्यांवर आता कडक कारवाई होईल. ज्येष्ठ नागरिक, महिला आणि मुलांसाठी सुरक्षित रस्ते निर्माण करण्यासाठी प्रत्येकाने जबाबदारीने वाहन चालवावे," असे आवाहन केले आहे. परिसरातील रहिवासी संघटनेनेही "सुरक्षित वाहतूक अभियान" राबवण्याची घोषणा केली असून, बेफिकीर चालकांना आता कायदेशीर धडा शिकवण्याची वेळ आली आहे. अन्यथा, अशा दुर्घटना टाळता येतील का?