बदलत्या हवामानाचा आरोग्यावर परिणाम

रात्री थंडी तर दिवसा कडक उन; खवखव, खोकला, सर्दीसारखे आजार

। तळा । वार्ताहर ।

गेल्या काही दिवसांपासून तळा तालुक्यातील नागरिकांना खोकला आणि घशाच्या खवखवीने हैराण केले आहे. वातावरणात होणार्या बदलांमुळे हे प्रकार होत असल्याचे आरोग्य तज्ज्ञांचे मत आहे. नोव्हेंबर व डिसेंबरमधील वातावरणातील बदलामुळे सध्या खोकला, घशाची खवखव याचा त्रास नागरिकांना होऊ लागला आहे. त्यामुळे घशाची खवखव व खोकल्याच्या रुग्णांच्या संख्येत नेहमीपेक्षा साधारणपणे 25 ते 30 टक्क्यांनी वाढ झाली असल्याचे डॉक्टरांकडून सांगण्यात आले.

यासोबतच हवेत काहीसा गारवा पसरल्याने त्वचा कोरडी पडली जाते. त्यामुळे त्वचेला खाज येणे किंवा पुरळ उठणे अशा त्वचेबाबत समस्या देखील वाढल्या असल्याने त्याचे रुग्ण देखील वाढत आहेत. त्यातच दिवसभर ढगाळ तर कधी कडक उन्ह त्यातच रात्री बोचरी थंडी त्यामुळे बदलत्या वातावरणाचा फटका लहानांपासून ते वयोवृद्धांना देखील बसत आहे. तळा तालुक्यामध्ये सध्या रात्री थंडी तर दिवसा कडक उन्हाळा असे वातावरण आहे. त्यातच हवामान घसरल्याने या वातावरण बदलाचा परिणाम नागरिकांच्या आरोग्यावर दिसून येत आहे. त्यामुळे काही दिवसांपासून तळातील नागरिकांच्या घशात खवखव वाढली असून, खोकल्याचा त्रास असलेल्या रुग्णांची संख्या झपाट्याने वाढत आहे.

आजार पसरण्याची कारणे.
सध्या बदलत असलेले वातावरण आणि हवेतील परागकण यामुळे नागरिकांना संसर्ग होण्याचे प्रमाण वाढले आहे. दिवसा गरमी तर रात्री थंडी असे वातावरण असल्याने त्याचा परिणाम थेट नागरिकांच्या आरोग्यावर होत आहे. त्यामुळेच खवखव, खोकला, सर्दीसारखे आजार होत आहेत.

थंडी असताना नागरिकांनी टू व्हीलर वरून प्रवास करणे टाळावे, बाहेर पडताना स्वेटर, कानटोपी, यांसारखे उबदार कपडे घालावेत, नागरिकांनी नियमित सकस आहार घ्यावा, दमा व ऍलर्जी असणार्‍या नागरिकांनी विशेष काळजी घ्यावी. तसेच सर्दी पडसे झाले असल्यास घरीच वाफ घ्यावी.

डॉ.गजेंद्र मोधे
वैद्यकीय अधिकारी, तळा प्राथमिक आरोग्य केंद्र