आरसीबीने रचला इतिहास

आयपीएलमध्ये ‘हा’ पराक्रम करणारा ठरला पहिला संघ

। मुंबई । प्रतिनिधी ।

रॉयल चॅलेंजर्स बंगळुरू संघाने चेन्नई सुपर किंग्जला शेवटच्या साखळी सामन्यात धूळ चारुन प्लेऑफमध्ये स्थान पक्के केले आहे. प्लेऑफ्समध्ये पोहोचण्यासाठी रॉयल चॅलेंजर्स बंगळुरुला चेन्नई सुपर किंग्जचा 18 किंवा त्याहून अधिक धावांच्या फरकाने पराभव करायचा होता. मात्र, आरसीबीने सीएसकेचा 27 धावांनी धुव्वा उडवत प्लेऑफ्समध्ये धडक मारली. यासह आता आयपीएलच्या इतिहासात आरसीबीच्या नावावर एक मोठा विक्रम नोंदवला गेला आहे.

आयपीएलच्या 17 व्या मोसमात प्लेऑफमध्ये स्थान मिळवणारे चारही संघ निश्‍चित झाले आहेत. ज्यामध्ये कोलकाता नाईट रायडर्स, सनरायझर्स हैदराबाद आणि राजस्थान रॉयल्सने आधीच स्थान मिळवले होते. रॉयल चॅलेंजर्स बंगळुरु संघासाठी लीग टप्प्यातील सामन्यांचा सुरुवातीचा टप्पा खूपच खराब होता. ज्यामध्ये त्यांना पहिल्या सात सामन्यांपैकी फक्त एकच सामना जिंकता आला होता. यानंतर, आरसीबीने आयपीएल 2024 च्या उत्तरार्धात शानदार पुनरागमन केले आणि पुढील सात पैकी सहा सामने जिंकून प्लेऑफमध्ये आपले स्थान निश्‍चित केले. यासह, आरसीबी आयपीएलच्या इतिहासातील पहिल्या सात सामन्यांपैकी केवळ एक सामना जिंकून प्लेऑफसाठी पात्र ठरणारा पहिला संघ ठरला आहे. आरसीबी संघाला आता 22 मे रोजी प्लेऑफमध्ये आपला पुढील सामना खेळायचा आहे. जो एलिमिनेटर सामना असेल आणि तो अहमदाबादच्या नरेंद्र मोदी स्टेडियमवर खेळला जाईल. या सामन्यात आरसीबीचा सामना राजस्थान रॉयल्स किंवा सनरायझर्स हैदराबाद संघाशी होऊ शकतो.

प्लेऑफ्समधील आरसीबीची आतापर्यंतची कामगिरी
आयपीएलच्या इतिहासात नव्यांदा आरसीबी संघाने प्लेऑफमध्ये आपले स्थान पक्के केले आहे. याआधी, जेव्हा संघ आठ वेळा प्लेऑफ्समध्ये पोहोचला आहे. तेव्हा तो केवळ तीन वेळा अंतिम फेरीत पोहोचू शकला आहे. या तिन्हींमध्ये पराभवाचा सामना करावा लागला आहे. पाच वेळा संघाचा प्रवास प्लेऑफ सामन्यांमध्ये पराभवाने संपला. 2016 च्या मोसमात आरसीबी संघ आयपीएल फायनलमध्ये पोहोचला होता. ज्यामध्ये त्यांना सनरायझर्स हैदराबादकडून आठ धावांनी पराभव स्वीकारावा लागला होता.

शेवटच्या षटकात यश; दयालची निर्णायक गोलंदाजी
पहिल्या चेंडूवर धोनीने फाइन लेगवर जोरदार शॉट खेळला आणि 110 मीटरचा षटकार मारला. आता संघाला पाच चेंडूत 11 धावांची गरज होती. पण पुढच्याच चेंडूवर धोनी स्वप्नील सिंगच्या हाती झेलबाद झाला. त्यानंतर शार्दुल ठाकूर फलंदाजीला आला. तिसर्‍या चेंडूवर एकही धाव आली नाही. आता सीएसके संघाला तीन चेंडूत 11 धावांची गरज होती. चौथ्या चेंडूवर शार्दुलने थर्ड मॅनच्या दिशेने शॉट खेळला आणि एक धाव घेतली. आता चेन्नईला प्लेऑप्समध्ये पात्र ठरण्यासाठी दोन चेंडूत 10 धावांची गरज होती. जडेजा क्रीजवर स्ट्राइकवर होता. दयालने ओव्हरच्या शेवटचे दोन्ही चेंडू डॉट्स टाकले. ज्यामुळे आरसीबीच्या विजयावर शिक्कामोर्तब झाले.