‘बूथ ताब्यात घेण्याचा नवा परळी पॅटर्न’

रोहित पवारांच्या आरोपाने खळबळ

पुणे । वृत्तसंस्था ।

लोकसभा निवडणुकीच्या पाचव्या टप्प्यासाठी आणि महाराष्ट्रातील शेवटच्या टप्प्यासाठी सोमवारी (दि.20) मे मतदान होणार आहे. आतापर्यंत चार टप्यांतील मतदान झाले आहे. आता राष्ट्रवादी काँग्रेस शरद पवार गटाचे आमदार रोहित पवार यांनी एक व्हिडीओ एक्स अकाउंटवर पोस्ट केला आहे. तसेच बीड लोकसभा मतदारसंघातील मतदानावर प्रश्‍नचिन्ह उपस्थित करत राष्ट्रवादी काँग्रेस अजित पवार गटाचे नेते धनंजय मुंडे यांच्यावर थेट नाव न घेता गंभीर आरोप केले आहेत. लोकसभा निवडणुकीचे आतापर्यंत चार टप्प्यात मतदान पार पडले आहे. या चारही टप्प्यातील मतदानादरम्यान बारामती, अहमदनगर, शिरूर मतदारसंघातील काही व्हिडीओ रोहित पवार यांनी एक्स अकाउंटवर शेअर केले होते. त्यामध्ये काही मतदान केंद्रामध्ये गैरप्रकार झाल्याचा आरोप त्यांनी केला होता. (दि.13) मे रोजी बीड लोकसभा मतदारसंघात मतदान पार पडले होते. या मतदानानंतर विरोधकांनी मतदान केंद्रामध्ये गैरप्रकार झाल्याचा आरोप केला होता. मात्र, यानंतर आता शरद पवार गटाचे आमदार रोहित पवार यांनी बीड लोकसभा मतदारसंघातील एक व्हिडीओ एक्स अकाउंटवर शेअर केला आहे.

रोहित पवार यांनी शेअर केलेल्या पोस्टमध्ये म्हटलं की, “बूथ ताब्यात घेऊन मतदान करण्याचा परळी पॅटर्न महाराष्ट्राला शोभत नाही. ही हिम्मत कुठून येते? निवडणूक आयोग किती दिवस बघ्याची भूमिका घेणार?’’, असे अनेक सवाल रोहित पवार यांनी विचारले आहेत. रोहित पवार यांनी शेअर केलेला व्हिडीओ हा बीड जिल्ह्यातील इंजेगावमधील असल्याची माहिती समोर येत आहे. यानंतर येथील काही गावकर्‍यांनी प्रतिक्रिया देत आमच्या गावाला बदनाम करू नये, असं म्हटलं आहे. दरम्यान, रोहित पवार यांनी केलेल्या या आरोपावर धनंजय मुंडे किंवा पंकजा मुंडे यांची प्रतिक्रिया आलेली नाही.