अवैध मटका व्यवसाय तेजीत

पोलीस, स्थानिक लोकप्रतिनिधींचे पाठबळ?; नागरिकांमध्ये संतापाचे वातावरण

। महाड । प्रतिनिधी ।

महाडमध्ये कारवाईच्या नावाखाली बंद केलेला मटका व्यवसाय पुन्हा जोमाने सुरु झाल्याचे चित्र आहे. पोलीस आणि स्थानिक लोकप्रतिनिधींच्या पाठबळावर ऐतिहासिक शहरात खुलेआम मटका व्यवसाय सुरु असल्याने नागरिकांमध्ये संताप व्यक्त होत आहे. यामुळे त्या त्या क्षेत्रातील पोलीस अधिकार्‍यांवर कारवाई झाली पाहिजे, अशी मागणी केली जात आहे.

ऐतिहासिक महाड शहर ही राजे छत्रपती शिवाजी महाराज, महामानव डॉ. बाबासाहेब आंबेडकर यांच्या पद्स्पर्शाने पावन झालेली भूमी आहे. राजकीय, सांस्कृतिक, सामाजिक क्षेत्रातील दिग्गज या महाड क्रांतीभूमीने दिले आहेत. महाडमध्ये वीरेश्‍वर महाराजांचा छबिना उत्सवदेखील प्रसिद्ध आहे. तर, ऐतिहासिक चवदारतळे येथे प्रतिवर्षी लाखो भीम अनुयायी महामानवाला अभिवान करण्यासाठी येत असतात. प्रतिवर्षी लाखो पर्यटक याठिकाणी भेट देत असतात. अशा ऐतिहासिक शहरात गेली अनेक वर्षे खुलेआम मटका, ऑनलाईन लॉटरी, आणि सोशल क्लबच्या नावाखाली पत्त्याचे डाव रंगत आहेत. याबाबत सातत्याने मटका हे बेकायदेशीर व्यवसाय बंद व्हावेत म्हणून मागणी होत असली, तरी पोलीस प्रशासन याकडे दुर्लक्ष करत आहे. यामुळे गल्लीत दिसणारी मटका दुकाने आता थेट रस्त्यावर टपरी टाकून खुलेआम सुरु करण्यात आली आहेत.

महाड शहरात नवीन येणार्‍या अधिकार्‍यांकडून तात्पुरती धमक दाखवत हे व्यवसाय काही दिवसांकरिता बंद ठेवले जातात. मात्र, अवघ्या काही दिवसात हे व्यवसाय पुन्हा सुरु केले जातात. त्यातच अनेकजण हे राजकीय पक्षांशी संबंधित असल्याने त्यांना राजकीय पाठबळदेखील लाभत आहे. राजकीय नेत्यांनी बंद म्हटले की हे व्यवसाय बंद आणि सुरु करा म्हटले की सुरु अशी परिस्थिती महाडमध्ये सुरु आहे.

सध्या गल्लोगली मटका आणि ऑनलाईन लॉटरीची दुकाने सुरु झाली आहेत. याबाबत गेली काही दिवसांपासून नागरिकांनी तक्रारी केल्या आहेत. मात्र, पोलीस प्रशासनाने याकडे जाणीवपूर्वक कानाडोळा केला आहे. शहरातील छत्रपती शिवाजी चौक परिसरालादेखील या व्यवसायाने वेढा दिला आहे. त्याचप्रमाणे शहरातील प्रमुख रस्ते, नातेखिंड, महामार्ग याठिकाणी टपर्‍यांमधून मटका दुकाने खुलेआम सुरु झाली आहेत. ग्रामीण भागातील जनता, आदिवासी, तरुण मुले झटपट पैसा मिळवण्याच्या हेतूने मटका आणि ऑनलाईन लॉटरीकडे वळत आहेत. यातून व्यसनाधीनता दिवसेंदिवस वाढत चालली आहे.

महाड शहर पोलीस ठाण्याचे पोलीस निरीक्षक संतोष जाधव यांनी काही दिवसांपूर्वी थातूरमातूर कारवाई केली. मात्र, काही दिवसातच हे मटका व्यवसाय पुन्हा सुरू झाले आहेत. संतोष जाधव यांनी यावेळी ज्या ज्या वेळेस अवैध व्यवसाय सुरूच दिसेल. त्या त्यावेळेस कारवाई केली जाईल, असे सांगितले होते. तर दुसरीकडे औद्योगिक पोलीस ठाण्याचे पोलीस हे मात्र आपल्या कार्यक्षेत्रात मटका व्यवसाय सुरूच नाही, असा दावा करत आहेत. मात्र, बिरवाडीमध्ये भरदिवसा भरवस्तीमध्ये हे व्यवसाय सुरू असल्याचे दिसून येते.

आदिवासी तरुणांना विळखा
पोटाची भूक भागवण्यासाठी धडपड करत असलेले आदिवासी या मटका दुकानांचे बळी ठरत आहेत. दिवसभर मेहनत करून कमावणारे आपले पैसे मटक्यावर उधळत असल्याने अनेकांचे संसार धोक्यात आले आहेत. पोलीस प्रशासनाच्या पाठबळाने हे व्यवसाय सुरु असल्याचे व्यावसायिकांचे म्हणणे आहे. यामुळे आमचे कोणी काही बिघडवू शकत नाही, अशी भाषा केली जात आहे. मासेमारी, मजुरी करून दिवसभरात कमावलेले पैसे या मटका आणि भिंगरुटसारख्या खेळांवर उधळले जात आहेत.

बिरवाडीमध्ये देखील 
मटका व्यवसाय तेजीत
महाड औद्योगिक क्षेत्रात असलेल्या कंपन्यांमधून असलेले कामगार, चालक, मजूर हे दिवसा मेहनत करून कमावतात आणि संध्याकाळी ऑनलाईन लॉटरी, मटक्यावर खर्च करतात. बिरवाडीमध्ये जवळपास आठ ते दहा मटका दुकाने असल्याची माहिती स्थानिक नागरिकाने दिली. पोलीस कारवाई कुचकामी ठरत आहे.