रायगड हॉस्पिटल येथील घटना! रोहित गवळी मृत्यू प्रकरणी कोर्टाचा मोठा निर्णय

| नेरळ | प्रतिनिधी |

कर्जत तालुक्यातील माणिवली गावातील रोहित गवळी या दहावी मध्ये शिकणाऱ्या तरुणाचा रायगड हॉस्पिटल मध्ये उपचार घेत असताना मृत्यू झाला होता. या प्रकरणी चुकीच्या पद्धतीने उपचार केल्याचा ठपका रोहित गवळी यांच्या नातेवाईक यांनी केला होता. दरम्यान या प्रकरणी न्यायालयाने आरोपी म्हणून चार डॉक्टरांवर गुन्हा दाखल करण्याचे आदेश दिले आहेत, तर संस्था चालक यांना सह आरोपी करावे असे आदेशात नमूद केले आहे.

नेरळ जवळील माणिवली गावातील 16 वर्षीय रोहित गवळी हा 4 सप्टेंबर 2025 रोजी रायगड हॉस्पिटलमध्ये उपचारासाठी दाखल झाला. रुग्णालयात त्याच्यावर अपेन्डिसवर शस्त्रक्रिया करण्यात आली आणि शस्त्रक्रिये दरम्यान रोहितचा दुर्दैवी मृत्यू झाला. रुग्णाला भूल न देता शस्त्रक्रिया करण्यात आली आणि त्याबाबत कल्पना रुग्ण रोहित गवळी याचे कुटुंबाना देण्यात आली नव्हती असा आरोप नातेवाईक यांनी रोहित गवळी याच्या मृत्यूनंतर केला होता. रुग्ण दगावल्याने वैद्यकीय हलगर्जी प्रकरणात डॉ. अमरसिंह बाबासाहेब कांबळे, डॉ. महंमद दानीश मुस्ताक अहमद, डॉ. तेजेश दत्तात्रेय हुजरे व डॉ. शिवकुमार वेलुदास यादव यांच्याविरोधात कठोर कारवाई करावी, तसेच मेडिकल कौन्सिल व इतर संबंधित प्राधिकरणांकडे तक्रार दाखल करून आवश्यक ती कारवाई करण्यात यावी अशी मागणी करण्यात आली होती. सदर तक्रार अर्ज नातेवाईक यांच्याकडून नेरळ पोलीस ठाणे येथे वरिष्ठ अर्ज क्रमांक 120/2026 अन्वये नोंदविण्यात आलेला आहे. या संदर्भात,नेरळ पोलीस ठाण्यात दिनांक 02 मार्च 2024 रोजी रात्री 23:29 वाजता गुन्हा दाखल करण्यात आला होता.

सदर गुन्ह्याचा तपास नेरळ पोलीस ठाण्याचे तत्कालीन सहाय्यक पोलीस निरीक्षक शिवाजी ढवळे यांनी सखोलपणे करून संबंधित आरोपींविरुद्ध आवश्यक ते पुरावे संकलित केले. तसेच मेडिकल कौन्सिलने संबंधित चार डॉक्टर आणि व्यवस्थापनाला दोषी ठरवले. तपासाअंती उपलब्ध झालेल्या पुराव्यांच्या आधारे वरील नमूद डॉक्टर आरोपींविरुद्ध दिनांक 04 सप्टेंबर 2025 रोजी मा. प्रथमवर्ग न्यायदंडाधिकारी, कर्जत यांच्या न्यायालयात दोषारोपपत्र दाखल करण्यात आले असून त्याची नोंद समरी केस अशी करण्यात आलेली आहे. तसेच, तपासा दरम्यान संबंधित घटनेत हॉस्पिटल व्यवस्थापनाची देखील जबाबदारी आढळून आली. त्यामुळे संस्थेचे चेअरमन डॉ. नंदकुमार तासगावकर, सेक्रेटरी यादवराव कांबळे, जॉईंट सेक्रेटरी वंदना नंदकुमार तासगावकर, विश्वस्त डॉ. शशिकांत रामचंद्र गंगावणे आणि चंद्रशेखर सिताराम सुळगावकर यांना देखील या गुन्ह्यात आरोपी करण्यात आले आहे. त्यांच्या विरोधात दिनांक 03 एप्रिल 2026 रोजी पूरक दोषारोपपत्र मा. प्रथमवर्ग न्यायदंडाधिकारी, कर्जत यांच्या न्यायालयात सादर करण्यात आलेले आहे.