सिलिंडरचे दर वाढले

घरगुती 60 तर व्यावसायिकांना मोजावे लागणार 115 रुपये अधिक

| रायगड | जिल्हा प्रतिनिधी |

इस्त्रायल आणि इराण या देशांच्या युध्दजन्य परिस्थितीचा फटका रायगड जिल्ह्यातील गॅसधारकांना बसला आहे. आता घरगुती गॅसधारकांना एका सिलिंडरमागे 60 रुपये तर व्यावसायिकांना 115 रुपये अधिक मोजावे लागणार आहेत. सिलिंडरच्या दरात रात्रीपासून वाढ करण्यात आल्याची माहिती समोर आली असून सिलिंडरसाठी एक महिना प्रतीक्षा करावे लागणार आहे. त्यामुळे सिलिंडरचा वापर जपून करा, असे आवाहन करण्यात येत आहे.

पूर्वी चुलीवर स्वयंपाक केला जात होता. चुलीवरील धुरामुळे घरोघरी गॅस सिलिंडरचे कनेक्शन घेण्यात आले. वन विभागानेदेखील पुढाकार घेत आदिवासीवाड्यांसह अनेक ठिकाणी मोफत गॅस सिलिंडर दिले. उज्वला योजनेअंतर्गत गॅस सिलिंडर देण्यात आले. जिल्ह्यामध्ये आता घरोघरी गॅसचे कनेक्शन आहे. त्यामुळे जिल्ह्यात गॅस वापराचे जाळे मोठ्या प्रमाणात वाढले आहे. चुलीची जागा आता गॅसेने घेतल्याने गॅसची मागणीही प्रचंड वाढली आहे. घरगूती वापरासह व्यावसायिक कामांसाठी सिलिंडर गॅसची गरज वाढत आहे. जिल्हा पर्यटनाच्या दृष्टीने महत्वाचा ठरत आहे. त्यामुळे हॉटेल, कॉटेजमध्ये घरगुती भोजनाचा आनंद घेण्यासाठी पर्यटक रायगड जिल्ह्याला आवर्जून भेट देतात. जिल्ह्यात दोन हजारहून अधिक हॉटेल, कॉटेज, रेस्टॉरन्ट आहेत. यातूनच रोजगाराचे साधन स्थानिकांना उपलब्ध होत आहे. जिल्ह्यात नाक्यानाक्यावर चहा, वडापाव इतर लहान मोठे खाद्य पदार्थांची दुकाने आहेत. त्यामुळे खाद्य पदार्थांचा आस्वाद घेण्याचा आनंद स्थानिकांसह पर्यटक लुटत आहेत. स्वयंपाकासह बाजारात वेगवेगळे खाद्य पदार्थ तयार करण्यासाठी सिलेंडरची गरज मोठ्या प्रमाणात आहे. सिलिंडरला प्रचंड मागणी वाढली आहे. मागील काही महिन्यांपासून घरगुतीसह व्यावसायिक सिलिंडरच्या दरात घट झाली होती. मात्र रात्रीपासून या दरांमध्ये वाढ झाल्याची माहिती समोर आली आहे. इस्त्रायल आणि इराणमध्ये युध्दजन्य परिस्थिती निर्माण झाली आहे. गॅस सिलिंडरचा तुटवडा निर्माण झाला आहे. जिल्ह्यात काही गॅस एजन्सीमधील सिलिंडरचा साठा संपला आहे. तर काही गॅस एजन्सीमध्ये दोन दिवस पुरेल इतका साठा असल्याची माहिती समोर आली आहे.

पूर्वी घरगुती सिलिंडरसाठी 863 रुपये तर व्यावसायिक सिलिंडरसाठी एक हजार 746 रुपये मोजावे लागत होते. आता मात्र सिलेंडरची टंचाई निर्माण झाल्याने त्याच्या दरात भरमसाठ वाढ करण्यात आली आहे. घरगुती सिलिंडर मागे 60 रुपये आणि व्यावसायिक सिलिंडरमागे 115 रुपये अधिक मोजावे लागणार आहे. त्यामुळे घरगुती सिलिंडर घेण्यासाठी 950 रुपयांहून अधिक तर व्यावसायिक सिलिंडरसाठी एक हजार 900 पर्यंत रुपये मोजावे लागणार आहे.

सिलिंडर मिळविण्यासाठी ग्राहकांनी आता 25 अथवा 30 दिवसांची प्रतिक्षा करावी लागणार असल्याची माहिती उपलब्ध झाली आहे. गॅस सिलिंडरचा पुरवठा करणाऱ्या कंपनीकडून सिलिंडर मिळणार का? याकडे आता लक्ष लागून राहिले आहे.