जिल्ह्यात बांगलादेशींची वाढती घुसखोरी

कामगारांच्या नावाने राहतात अस्तित्व लपवून

। अलिबाग । प्रमोद जाधव ।

स्थानिक कामगार काम करीत नाही, अशी ओरड अनेक ठेकेदारांची कायमच राहिली आहे. त्यामुळे वेगवेगळ्या राज्यांतून कामगार बोलावून रस्ता व इतर बांधकामांची कामे त्यांच्याकडून करून घेतात. कामगार म्हणून वावरणारी काही परराज्यातील मंडळी बांगलादेशी असल्याचा प्रकार समोर आला आहे. मागील काही वर्षांपासून 27 हून अधिक बांगलादेशींनी जिल्ह्यामध्ये घुसखोरी केल्याचे आकडेवारीनुसार स्पष्ट झाले आहे. कामगार म्हणून एका ठेकेदाराच्या मदतीने ते स्वतःचे अस्तित्व लपवून राहात आहेत. त्यामुळे जिल्ह्यात बांगलादेशी घुसखोरी वाढण्याची भीती निर्माण झाली आहे.

रायगड जिल्ह्यामध्ये गेल्या दोन दिवसांपासून बांगलादेशी शोधमोहीम राबविण्यास सुरुवात केली आहे. जिल्ह्यातील 28 पोलीस ठाण्यांतील पोलीस कामाला लागले. वेगवेगळ्या खबर्‍यांकडून माहिती घेऊन बांगलादेशींचा शोध सुरु करण्यात आला. महाडमधील पिंपळदरी मोरांडे वाडी येथे बांगलादेशी कामगार म्हणून राहात असल्याची माहिती पोलिसांना मिळाली. महाड एमआयडीसी पोलिसांनी तपास पथक तयार करून एका घरावर छापा टाकला. त्या घरात पोलिसांना एक महिला व पाच पुरुष असे सहा जण दिसून आले. चंद्रकांत शिंदे यांच्या घरात ही मंडळी राहात होती. गेल्या काही महिन्यांपासून पीडीआयपीएल या बांधकाम कंपनीने रस्त्याच्या कामांसाठी त्यांना कामगार म्हणून ठेवल्याची माहिती पोलिसांनी मिळाली. त्या सहाही जणांची चौकशी केली. त्यांच्याकडे कोणत्याही प्रकारची कागदपत्रे दिसून आली नाहीत.

गरिबी व उपासमारीला कंटाळून रोजगारासाठी सीमेवरील गस्ती पथकाची नजर चुकवून भारतामध्ये प्रवेश केल्याची माहिती समोर आली. महाड तालुक्यातील पिंपळदरीबरोबरच वरंध या ठिकाणी हे नागरिक राहात होते. जिल्ह्यामध्ये औद्योगिकीकरण झपाट्याने वाढत आहे. वेगवेगळ्या कामानिमित्त वेगवेगळ्या राज्यातून कामगारांना बोलावले जाते. रस्ते व इतर बांधकामांसाठी परराज्यातील कामगारांची संख्या जिल्ह्यात दिवसेंदिवस वाढत आहे. परंतु, यातील काही कामगार बांगलादेशातील असूनही ते ठेकेदाराच्या मदतीने ओळख लपवून जिल्ह्यात राहात असल्याचे चित्र आहे. भारतात राहताना दुसर्‍या देशातील अधिकृत परवाना असे आवश्यक आहे. तरीदेखील काही ठेकेदार आपल्या आर्थिक फायद्यासाठी बांगलादेशींना कमी वेतनामध्ये राबवण्याचा प्रयत्न करतात. त्यांना भाड्याच्या खोलीमध्ये राहण्याची व्यवस्थादेखील करतात. मात्र, याची साधी कुणकुणदेखील स्थानिक पोलिसांना देत नसल्याचे पोलिसांच्या कारवाईतून स्पष्ट होऊ लागले आहे.

जिल्ह्यामध्ये आतापर्यंत 27 बांगलादेशी घुसखोरांना पकडण्यात पोलिसांना यश आले आहे. 2024 पर्यंत 21 आणि 2025 मध्ये जानेवारीत 6 बांगलादेशींना पकडण्यात आले आहे. रोजंदारीच्या नावाखाली जिल्ह्यात बांगलादेशींची घुसखोरी वाढू लागली आहे. काही स्थानिकांसह ठेकेदारांचे त्यांना अभय मिळत आहे. त्यामुळे बांगलादेशीचा वावर जिल्ह्यात वाढत आहे.

रायगड जिल्ह्यामध्ये बांगलादेशी विरोधात शोधमोहीम सुरु केली आहे. महाडमध्ये सहा बांगलादेशी पोलिसांना सापडले आहेत. संबंधित कंपनीविरोधात गुन्हा दाखल करण्यात आला असून, बांगलादेशींना ताब्यात घेण्यात आले आहे.

सोमनाथ घार्गे,
पोलीस अधीक्षक, रायगड