इनडोअर क्रिकेट स्पर्धेत भारत अव्वल

। कोलंबो । क्रीडा प्रतिनिधी ।

जागतिक इनडोअर क्रिकेट महासंघाच्या मान्यतेने सिलोन इनडोअर क्रिकेट असोशिएशन यांच्या पुढाकाराने इंग्लंड-एशिया कप इनडोअर क्रिकेट स्पर्धेला सुरुवात झाली आहे. या स्पर्धेत भारतीय पुरुष संघाच्या चमकदार कामगिरीने भारत गुणतालिकेत अव्वल स्थानावर आहे. भारतीय पुरुष संघाने श्रीलंका डेव्हलपमेंट व सिंगापूरला दणका देत हे स्थान काबीज केले आहे.

इनडोअर क्रिकेटमध्ये 8 खेळाडू मैदानात खेळतात व प्रत्येक जोडीला 4 षटके फलंदाजी करावी लागते. तर या दरम्यान बाद झालेल्या प्रत्येक खेळाडू बदल्यात संघाला 5 धावा गमवाव्या लागतात. रविवारी रात्री उशिरा झालेल्या सामन्यात भारतीय संघ श्रीलंकेवर विजय मिळवेल असे वाटत असताना श्रीलंकेने जोरदार मुसंडी मारत सामना बरोबरीत सोडवला. दोन्ही संघांनी 99-99 धावा केल्या व या सामन्यात दोन्ही संघांना 3.5 गुण मिळाले.

श्राीलंका विरुध्दच्या सामन्यात भारताने श्रीलंका डेव्हलपमेंट संघाचा 52 धावांनी पाराभाव केला. या सामन्यात भारताने प्रथम फलंदाजी करताना 115 धावा केल्या तर श्रीलंका डेव्हलपमेंट संघाला भारताने 16 षटकात 63 धावांत रोखत या सामन्यात 7 गुणांची कमाई केली. या सामन्यात भारताच्या दैविक राय व एम. मल्लिकार्जुन प्रत्येकी (16 धावा, 2 बळी), विजय गौडा (15 धावा व 2 बळी), अफरोज पाशा (21 धावा), धनुष भास्कर (12 धावा व 3 बळी) तर अधिराज जोहरी (12 धावा ) यांनी विजयात धमाकेदार कामगिरी केली.

सिंगापूर विरुध्द झालेल्या सामन्यात भारताने पहिल्या 16 षटकात सिंगापूरला 13 धावांत रोखत सहज विजयाचे ध्येय ठेवले. मात्र, भारताने 16 षटकात 143 धावा चोपून काढत 130 धावांनी विजय साजरा केला. या सामन्यात 7 गुणांची कमाई करत गुणतालिकेत प्रथम स्थान मिळवले आहे. सामन्यात विजय गौडा (16 धावा व 4 बळी), अफरोज पाशा (27 धावा, 2 बळी), दैविक राय(22 धावा, 1 बळी), अधिराज जोहरी (22 धावा, 1 बळी) यांनी जोरदार कामगिरी केली.

भारताने आत्तापर्यंत या स्पर्धेत 17.5 गुण मिळवत निर्विवाद वर्चस्व सिध्द केले असून श्रीलंका 16.5 गुणांसह दुसर्‍या स्थानावर आहे. तर 13 गुणांसह इंग्लंड तिसर्‍या स्थानावर आहे.