आयपीएलचा मिनी-लिलावा डिसेंबरमध्ये

खेळाडूंवर होणार पैशांचा पाऊस; यंदा गोव्यात आयोजन

| नवी दिल्ली | वृत्तसंस्था |

आयपीएल 2027 साठी खेळाडूंच्या मिनी-लिलावाचे आयोजन दि.16 डिसेंबर रोजी गोव्यात केले जाणार आहे. याआधी सर्व 10 संघांना दि.15 नोव्हेंबरपर्यंत आपल्या कोणत्या जुन्या खेळाडूंना संघात कायम ठेवणार आणि कोणाला रिलीज करणार, हे सांगावे लागणार आहे. त्यानंतर लिलाव सुरू होण्याच्या ठीक एक आठवडा आधी संघांना त्या खेळाडूंची अंतिम यादी आणि कोणत्या क्रमांकावर कोणाची बोली लागेल, याची संपूर्ण माहिती मिळणार आहे.

आयपीएल 2026चा हंगाम संपल्यानंतर आयपीएलमध्ये आतापर्यंत केवळ दोनच खेळाडूंची ट्रेड (देवघेव) झाली आहे. आयपीएलच्या नियमानुसार खेळाडूंच्या ट्रेडचा हा कालावधी हंगाम संपल्यानंतर ठीक एका महिन्याने सुरू होतो आणि लिलावाच्या एक आठवड्याआधीपर्यंत उघडा राहतो. त्यानंतर ही खिडकी पुन्हा उघडते आणि पुढील हंगाम सुरू होण्याच्या ठीक एका महिन्याआधीपर्यंत सुरू राहते. याच वर्षी जूनमध्ये, लखनऊ सुपर जायंट्स संघाने आपला कर्णधार ऋषभ पंतला दिल्ली कॅपिटल्सला दिले आणि त्याच्या बदल्यात मनगटी फिरकीपटू (रिस्ट स्पिनर) कुलदीप यादवला आपल्या संघात समाविष्ट करून घेतले. याशिवाय नुकतेच, दिल्लीने आपला वेगवान गोलंदाज टी नटराजनला सनरायझर्स हैदराबादला दिले आणि त्याच्या जागी युवा लेग-स्पिनर झीशान अन्सारीला आपल्या संघात घेतले आहे. त्याने अद्याप आंतरराष्ट्रीय क्रिकेट खेळलेले नाही. तो एक अनकॅप्ड खेळाडू आहे.

आयपीएलने अद्याप 2027 च्या हंगामाच्या निश्चित तारखांची घोषणा केलेली नाही. तथापि, 2024 मध्ये पुढील तीन हंगामांच्या तारखा सांगताना 14 मार्च ते 30 मे दरम्यानचा काळ निश्चित करण्यात आला होता. परंतु, यावर्षी सप्टेंबरमध्ये बीसीसीआयच्या वार्षिक सर्वसाधारण बैठकीनंतर मंडळाचे सचिव देवाजीत सैकिया यांनी संकेत दिले होते की ही स्पर्धा मार्चच्या शेवटी सुरू होऊ शकते. तसेच, मागील तीन आयपीएल लिलाव देशाबाहेर पार पडले होते. या लिलावांमध्ये संघांचे मालक, अधिकारी, कोचिंग स्टाफ आणि खेळाडूंची निवड करणाऱ्या प्रतिनिधींना उपस्थित राहावे लागते. एवढ्या सर्व लोकांसाठी परदेशात जाऊन राहणे, हॉटेल बुक करणे, वाहनांची व्यवस्था करणे आणि बाकी खर्च उचलणे केवळ अत्यंत महागडेच पडत नाही, तर त्यांचे नियोजन करणे देखील खूप गुंतागुंतीचे काम असते; विशेषतः मिनी-लिलावासाठी मेगा-लिलावाच्या तुलनेत खूप कमी खेळाडूंना खरेदी करायचे असते. तसेच, आयपीएल 2028 पूर्वी मेगा-लिलावाचे आयोजन केले जाणार आहे.