आयटी इंजिनिअरिंगच्या उत्तरपत्रिका चोरणारा ताब्यात

विद्यार्थ्यांचे शैक्षणिक नुकसान टळले

| नेरळ | प्रतिनिधी |

पनवेल येथील पिल्लई अभियांत्रिकी महाविद्यालयातील आयटी द्वितीय वर्षातील विद्यार्थ्यांनी परीक्षेमध्ये सोडलेले प्रश्‍न यांच्या उत्तरपत्रिका गहाळ झाल्या होत्या. त्या उत्तरपत्रिका मंदिराच्या बाहेर गाडी थांबल्यावर चोरून नेण्यात आल्या होत्या. त्याबाबत विद्यार्थ्यांचे नुकसान होणार याची कल्पना असल्याने नेरळ पोलिसांनी तत्काळ हालचाली केल्या आणि घटना घडल्यानंतर अवघ्या 36 तासांत खालापूर येथून एका तरुणाला ताब्यात घेतले. दरम्यान, आर्थिक फायद्यासाठी त्या उत्तरपत्रिका चोरून नेल्या असल्याचे आरोपीने कबूल केले आहे.

27 फेब्रुवारी रोजी पनवेल येथील प्रसिद्ध पिल्लई कॉलेज ऑफ इंजिनिअरिंगमधील प्राध्यापक असलेले हे सुट्टीच्या दिवशी उत्तर पत्रिका तपासण्यासाठी आपल्या घरी नेरळ येथे घेऊन येत होते. व्दितीय वर्षाच्या आयटी इंजिनिअरच्या या वर्गाच्या वैयक्तिक आर्थिक व्यवस्थापन या विषयाच्या 136 संंक्षिप्त उत्तरपत्रिका, हजेरीपट, प्रश्‍नपत्रिका असे साहित्य प्राध्यापक त्यांचे मित्र स्वप्नील वायंगनगर यांच्या स्कुटीवरून पनवेल येथून नेरळ ममदापूर जेथे घेऊन येत होते. ममदापूर-नेरळ येथे जात असताना गुरुवार असल्याने उकरुळ येथील साईबाबा मंदिरात सायंकाळी 7.20 वाजण्याचे सुमारास दर्शन घेण्यासाठी ते गेले. त्यांनी स्कूटी साईमंदिराबाहेर उभी करुन उत्तरपत्रिकांची बॅग स्कुटीच्या हँडलला लावून ते दर्शनासाठी गेले होते. मात्र, मंदिरातून दर्शन घेऊन बाहेर आल्यावर सदर स्कुटीला लावलेली बॅग चोरीस गेली असल्याचे लक्षात आले. विषयाचे गांभीर्य लक्षात घेत त्यांनी नेरळ पोलीस ठाण्यात हरवलेल्या उत्तरपत्रिकांची माहिती दिली. त्याबाबत नेरळ पोलिस ठाण्यात गुन्हा नोंद करण्यात आला. या गुन्ह्याचे गांभीर्य ओळखून विद्यार्थ्यांच्या शैक्षणिक भवितव्याचा विचार लक्षात घेऊन सदर गुन्हा उघडकीस आणण्यासाठी उपविभागीय पोलीस अधिकारी डी.डी. टेळे आणि नेरळ पोलीस ठाण्याचे प्रभारी अधिकारी शिवाजी ढवळे यांनी गुन्हे प्रकटीकरण पथकाच्या टीमला मार्गदर्शन केले.

पोलीस उपनिरीक्षक संदीप फड, पोलीस उपनिरीक्षक एस.डी. किसवे तसेच पोलीस हवालदार सचिन वाघमारे, किसवे, पोलीस शिपाई राजाभाऊ केकण, बेंद्रे यांनी तपासाला सुरुवात केली. गुन्हे प्रकटीकरण पथकाने घटना स्थळावरील सीसीटीव्ही कॅमेरे, गोपनीय माहिती आणि तांत्रिक तपासाच्या आधारे रूपेश भानुदास साळुंखे याचा शोध घेण्यास सुरुवात केली. त्याला खालापूर तालुक्यातील उंबरे वाडी येथून पकडून आणत मुद्देमाल हस्तगत केला. या तरुणावर खालापूर पोलीस ठाण्यातदेखील गुन्हा दाखल असून, गुन्ह्याचा तपास प्रवीण लोखंडे करीत आहेत.

उत्तर पत्रिका गहाळप्रकरणी अटक करण्यात आलेल्या रुपेश भानुदास साळुंखे याने आर्थिक फायद्यासाठी हा गुन्हा केली होता. हा गुन्हा 36 तासांत उघड करणार्‍या नेरळ पोलीस ठाण्याच्या गुन्हे प्रकटीकरण पथकाचे जिल्हा पोलीस अधीक्षक सोमनाथ घार्गे, अतिरिक्त पोलीस अधीक्षक अभिजित शिवतारे यांनी कौतुक केले आहे.