घरफोडीत १० लाखांचे दागिने केले लंपास

। पनवेल । वार्ताहर ।
नवीन पनवेल सेक्टर 18 मधील अष्टविनायक ओनर्स या इमारतीत भरदिवसा घरफोडी करुन अज्ञात चोरटयाने तब्बल 10 लाख रुपयांचा मुद्देमाल लंपास केला. याप्रकरणी खांदेश्‍वर पोलीस ठाण्यात अज्ञाताविरोधात गुन्हा दाखल करण्यात आला आहे.

नवीन पनवेल सेक्टर 18 मधील अष्टविनायक ओनर्स या इमारतीत मंगेश पुरुषन (63) हे पत्नी, दोन मुले व सुन यांच्यासोबत राहतात. मंगेश पुरुषन हे कामावर निघुन गेल्यानंतर त्यांच्या पाठोपाठ त्यांचा मुलगा व पत्नी देखील कामावर निघुन गेले. यावेळी घरातच असलेला त्यांचा लहान मुलगा हा देखील सकाळी 10.30 वाजता कामानिमित्त वाशी येथे गेला. याचदरम्यान, अज्ञात चोरटयाने पुरुषन यांच्या घराचे लॉक तोडुन आत प्रवेश केला. तसेच कपाटात असलेले सुमारे 10 लाख रुपये किंमतीचे सोन्याचे दागिने चोरुन नेले.

दरम्यान, मंगेश पुरुषन हे दुपारी सव्वा तीन वाजण्याच्या सुमारास कामावरुन घरी आल्यानंतर घरामध्ये चोरी झाल्याचे त्यांच्या लक्षात आले. त्यानंतर त्यांनी खांदेश्‍वर पोलीस ठाण्यात तक्रार दाखल केली.