जिद्द वैभवची साथ सक्षमची

तैवान येथे पीएचडीकरीता दिला मदतीचा हात
। अलिबाग । विशेष प्रतिनिधी ।
इच्छा शक्ती असली की प्रत्येक संकटावर मात करता येते हे सिद्ध करून प्रत्येक प्रसंगाला सामोरे जात अलिबाग तालुक्यातील किहीम गावातील वैभव तांबट या प्रतिभावान मुलाने एक पाऊल पुढे टाकत पीएचडी करण्याचा निर्णय घेतला. याकरीता तैवान येथील युनिव्हर्सिटीमध्ये त्याची निवड देखील झाली आहे. याकरीता सक्षम एज्युकेशन सोसायटीच्या माध्यमातून रायगड जिल्हा परिषदेचे मुख्य कार्यकारी अधिकारी डॉ. किरण पाटील यांच्या हस्ते 50 हजार रूपयांचा धनादेश प्रोत्साहनपर मदत म्हणून वैभव तांबट यांना सुपूर्द करण्यात आला व शुभेच्छा देण्यात आल्या.
वैभव तांबट यांनी वय अवघे दिड वर्षे असताना वडील गमावले व 14 वर्षाचा असताना आईला गमावले. पुढे अलिबाग तालुक्यातील किहीम या गावी मामा मिलींद समेळ यांच्याकडे राहून स्वयंसेवी संस्थांच्या मदतीने 12वी पर्यंत शिक्षण घेतले. नंतर पनवेल येथे सीकेटी कॉलेज मधून पदवीपर्यंत शिक्षण पूर्ण करून जळगाव येथे पदव्युत्तर शिक्षण घेतले. आर्थिक अडचणींसोबतच तैवान येथे पीएचडी करत असताना स्टायपेंड मिळेल परंतु प्रवास खर्च आहे, कोरोनाबाबत नियमावलीचे पालन करताना राहण्याची व अन्य व्यवस्था खर्चिक असल्याने आर्थिक ताळमेळ बसणे कठीण असल्याचे वैभवने सक्षम एज्युकेशन सोसायटीच्या सदस्यांची भेट घेत अडचण मांडली. सदर अडचण लक्षात घेऊन सक्षमचे मार्गदर्शक प्रशांत मोरजकर यांच्या आर्थिक मदतीतून कै.डॉ.अर्जुन मोरजकर शिष्यवृत्ती योजने अंतर्गत या गुणी विद्यार्थ्याला 50 हजार रूपयांची मदत करण्यात आली.
याप्रसंगी सक्षम एज्युकेशन सोसायटी तर्फे शार्दूल काठे, प्रतिम सुतार, योगेश पवार, गणेश भोईर, विशाल आमले, छाया म्हात्रे, प्रतीक म्हात्रे, अनिकेत नाईक, मिलींद समेळ आदी सदस्य उपस्थित होते. शैक्षणिक क्षेत्रात उत्तुंग भरारी घेणार्‍या विद्यार्थ्याला सहकार्य करता आल्याची भावना उपस्थित सदस्यांनी व्यक्त केली. तसेच सक्षम एज्युकेशन सोसायटीच्या आव्हानाला प्रतिसाद देत आर्थिक पाठबळ उभा करणार्‍या प्रत्येक दात्याचे यावेळी आभार मानण्यात आले. सदर कार्याची दखल घेत समाजातील अनेकांनी वैभव तांबट यांना शैक्षणिक कार्यासाठी मदतीचा ओघ सुरू झाला आहे.