जेएसएम महाविद्यालयास युवा महोत्सवाचे यजमानपद

। अलिबाग । विशेष प्रतिनिधी ।
महाविद्यालयीन विद्यार्थ्यांच्या कलागुणांना भव्य व्यासपीठ प्राप्त व्हावे म्हणून मुंबई विद्यापीठाच्या विद्यार्थी विकास कक्षातर्फे दरवर्षी जिल्हा व विद्यापीठ स्तरावर युवा महोत्सवाचे आयोजन केले जाते. संगीत, नृत्य, नाट्य, चित्रकला, रांगोळी अशा विविध ललित कला, वक्तृत्व, वादविवाद, कथालेखन अशा वाङमयीन स्पर्धा यांचा समावेश असलेल्या युवा महोत्सवाचे यंदाचे 55 वे वर्ष आहे. प्रारंभी केवळ विद्यापीठ स्तरावर आयोजित केल्या जाणार्‍या युवा महोत्सवाच्या जिल्हास्तरीय फेरीच्या आयोजनाचा मान यापूर्वी 1996, 2006 आणि 2017 साली जेएसएम महाविद्यालयास मिळाला होता. यावर्षी होणार्‍या 55 व्या युवा महोत्सवाच्या जिल्हास्तरीय फेरीच्या आयोजनाचा मानदेखील महाविद्यालयास प्राप्त झाला आहे.

युवा महोत्सवाच्या जिल्हास्तरीय फेरीचे आयोजन शुक्रवारी (दि.26) महाविद्यालयात होत आहे. अलिबाग, पेण, महाड, माणगाव, रोहा, मुरुड, तळा, श्रीवर्धन, म्हसळा, पोलादपूर, सुधागड या तालुक्यांतील विविध महाविद्यालयांतील सुमारे 500 ते 600 विद्यार्थी या दिवशी संगीत, नाट्य, नृत्य, वक्तृत्व, वादविवाद, कथाकथन, मेहेंदी, मूर्तीकला, कोलाज, कार्टूनिंग, चित्रकला, रांगोळी अशा विविध प्रकारच्या 32 स्पर्धांमध्ये सहभाग घेतील. युवा महोत्सवाप्रसंगी विविध कला क्षेत्रातील अनेक दिग्गज कलावंत उपस्थित राहणार आहेत. महोत्सवाच्या यशस्वी आयोजनासाठी जनता शिक्षण मंडळाचे अध्यक्ष अ‍ॅड. गौतम पाटील यांच्या नेतृत्वाखाली व प्राचार्य डॉ. अनिल पाटील यांच्या मार्गदर्शनाखाली रायगड जिल्हा सांस्कृतिक कार्यक्रम समन्वयक प्रा. जयेश म्हात्रे व इतर सर्व शिक्षक, शिक्षकेतर कर्मचारी व विद्यार्थी जोरदार तयारी करत आहेत.