जेएसएमचा पदवी प्रमाणपत्र वितरण सोहळा

ॲड. गौतम पाटील यांच्याकडून शुभेच्छा

| अलिबाग | प्रतिनिधी |

जे.एस.एम. व ॲड. दत्ता पाटील विधी महाविद्यालयातील शैक्षणिक वर्ष 2024-25 साठीचा पदवी प्रमाणपत्र वितरण सोहळा बुधवारी (दि.15) संपन्न झाला. यावेळी जे.एस.एम. महाविद्यालयातील पदवी प्राप्त केलेल्या 207 विद्यार्थ्यांना, तर विधी महाविद्यालयातून पदवी प्राप्त केलेल्या 80 विद्यार्थ्यांना पदवी व पदव्युत्तर पदवी प्रमाणपत्र देण्यात आले.

या सोहळ्याचे अध्यक्ष म्हणून जनता शिक्षण मंडळाचे अध्यक्ष ॲड. गौतम पाटील हे उपस्थित होते. तर, उपाध्यक्षा डॉ. साक्षी पाटील या विशेष अतिथी म्हणून उपस्थित होत्या. यावेळी व्यासपीठावर जे.एस.एम. कॉलेजच्या प्राचार्य डॉ. सोनाली पाटील व ॲड. दत्ता पाटील विधी महाविद्यालयाच्या प्र. प्राचार्य डॉ. नीलम हजारे आदी मान्यवर उपस्थित होते. या कार्यक्रमाला पदवीप्राप्त विद्यार्थ्यांच्या मिरवणुकीने या कार्यक्रमाला प्रारंभ झाला. यावेळी ॲड. दत्ता पाटील विधी महाविद्यालयाच्या प्र. प्राचार्य ॲड. डॉ. नीलम हजारे यांनी कार्यक्रमाचे प्रास्ताविक केले. त्यांनी सर्व यशस्वी पदवीधर विद्यार्थ्यांचे अभिनंदन करून त्यांना भावी वाटचालीकरिता शुभेच्छा दिल्या. आपल्या मनोगतात जे.एस.एम. महाविद्यालयाच्या प्राचार्य डॉ. सोनाली पाटील यांनी, पदवीदान समारंभ हा विद्यार्थ्यांच्या जीवनातील एक महत्वाचा व अविस्मरणीय क्षण असून विद्यार्थ्यांनी मिळविलेल्या ज्ञानाचा स्वत:च्या व समाजाच्या उत्कर्षासाठी विनियोग करावा, असे आवाहन करत, भावी आयुष्यात विशेष कर्तृत्व करून दाखवावे, असे प्रोत्साहन दिले.

त्यानंतर कार्यक्रमाचे अध्यक्ष ॲड. गौतम पाटील यांनी विद्यार्थ्यांना शुभेच्छा दिल्या व पदवी प्रमाणपत्र वितरण करण्यासंबधीची उद्घोषणा केली. यावेळी जे. एस. एम. महाविद्यालयातील कला, विज्ञान आणि वाणिज्य शाखांमधून पदवी प्राप्त केलेल्या 207 विद्यार्थ्यांना, तर विधी महाविद्यालयातून पदवी प्राप्त केलेल्या 80 विद्यार्थ्यांना पदवी व पदव्युत्तर पदवी प्रमाणपत्र अध्यक्ष ॲड. गौतम पाटील, उपाध्यक्षा डॉ. साक्षी पाटील, प्राचार्य डॉ. सोनाली पाटील, प्र. प्राचार्य ॲड. नीलम हजारे व विविध विषयांचे विभागप्रमुख यांच्या हस्ते प्रदान करण्यात आली.

यशस्वी विद्यार्थ्यांनी पदवी मान्यवरांच्या हस्ते स्वीकारण्याचा संस्मरणीय अनुभव प्राप्त झाल्याने विद्यार्थी, पालक, शिक्षक यांनी या सोहळ्याच्या आयोजनाबद्दल आनंद व्यक्त केला. या कार्यक्रमाला महाविद्यालायातील विविध विभागांचे विभागप्रमुख, प्राध्यापक, शिक्षक, शिक्षकेतर कर्मचारी, विद्यार्थी तसेच पालक उपस्थित होते. या कार्यक्रमाच्या आयोजनासाठी पदवी प्रमाणपत्र वितरण समितीचे प्रमुख प्रा. डॉ. प्रेम आचार्य व प्राध्यापक सदस्य यांनी विशेष परिश्रम घेतले. या कार्यक्रमास अनुपस्थित राहिलेल्या शैक्षणिक वर्ष 2024 -25 च्या पदवी, पदव्युत्तर परीक्षेत उत्तीर्ण विद्यार्थ्यांची पदवी प्रमाणपत्र महाविद्यालयाच्या कार्यालयात उपलब्ध असून संबंधित विद्यार्थ्यांनी दि.30 एप्रिलपर्यंत कार्यालयीन वेळेत ती घेऊन जावीत, असे आवाहन महाविद्यालयाच्या प्राचार्यांनी केले आहे.