सुधागडमध्ये खैरतस्करीचा पर्दाफाश

गुजरातचा व्यापारी गजाआड; वनविभागाची धडक कारवाई

| पाली/गोमाशी | वार्ताहर |

सुधागड पाली परिसरात अवैध वृक्षतोड आणि लाकूड तस्करीचा मोठा कट उघड झाला आहे. वन विभागाच्या सतर्कतेमुळे अवैध खैर लाकूड वाहतूक करणार्‍या गुजरातच्या व्यापार्‍याला अटक करण्यात आली असून, मोठ्या प्रमाणावर लाकूड आणि वाहन जप्त करण्यात आले आहे. ही कारवाई वन विभागाच्या धडक पथकाने केली असून, आरोपीला न्यायालयाने दोन दिवसांची पोलीस कोठडी सुनावली आहे.

वनविभागाच्या अधिकार्‍यांना खबर्‍याकडून मिळालेल्या गुप्त माहितीनुसार, खोपोली-पाली मार्गावरून मोठ्या प्रमाणावर खैर लाकडाची अवैध वाहतूक होत असल्याचा सुगावा लागला. तात्काळ कारवाई करत दादासाहेब सोपान कुकडे (वनक्षेत्रपाल, सुधागड), मनोज कृष्णा साळवी (वनपाल, मजरे जांभुळपाडा), राजेश विलास दबडे (वनपाल, कळंब) आणि संदीप दिगंबर ठाकरे (वनरक्षक, ढोडसे) यांच्या नेतृत्वाखाली एक विशेष पथक तयार करण्यात आले. हा सापळा अत्यंत योजनाबद्ध पद्धतीने रचला गेला. संशयास्पद वाहन जीजे-15-एव्ही 5783 हे पाली येथे आढळून आले. वाहनाची झडती घेतली असता, आत 687 नग सोललेले खैर लाकूड आढळून आले. ही संपूर्ण लाकूड तस्करी गुजरातहून चिपळूण व राजापूरमार्गे पुढे नेण्यात येत होती.

सहाय्यक उपवनसंरक्षक जावरे यांच्या मार्गदर्शनाखाली वनविभागाच्या अधिकर्‍यांच्या कारवाईमुळे अवैध वृक्षतोड करणार्‍यांचे धाबे दणाणले असून, स्थानिक नागरिकांनी या कामगिरीचे कौतुक केले आहे. अवैध लाकूडतस्करीच्या विरोधात अशीच कठोर कारवाई सुरू राहील, असा इशारा वन विभागाने दिला आहे.

गुजरातच्या व्यापार्‍यास बेड्या
या प्रकरणात आरोपी अजगर हाफिज खान (ता. वडोदा, गुजरात) याला ताब्यात घेण्यात आले. आरोपीवर भारतीय वन अधिनियमांतर्गत गुन्हा दाखल करण्यात आला असून, त्याला न्यायालयासमोर हजर करण्यात आले. कोर्टाने त्याला दोन दिवसांची पोलीस कोठडी सुनावली आहे.