उत्तीर्ण विद्यार्थ्यांचे डॉ. किरण पाटील यांनी केले अभिनंदन

| अलिबाग | विशेष प्रतिनिधी |
विद्यार्थ्यांच्या पुढील करिअरची दिशा ठरविणार्‍या दहावी परिक्षेचा निकाल शुक्रवारी (दि.१७) ऑनलाइन जाहिर करण्यात आला. रायगड जिल्ह्यातील ९७.३५ टक्के विद्यार्थी उत्तीर्ण झाले आहेत. या सर्व उत्तीर्ण विद्यार्थ्यांचे जिल्हा परिषदेचे मुख्य कार्यकारी अधिकारी डॉ. किरण पाटील यांनी अभिनंदन केले असून, पुढील भविष्यासाठी शुभेच्छा दिल्या आहेत.

महाराष्ट्र राज्य माध्यमिक व उच्च माध्यमिक शिक्षण मंडळातर्फे मार्च, एप्रिल महिन्यात दहावीची परीक्षा घेण्यात आली होती. दहावीत राज्यात ९६.९४ टक्के विद्यार्थी उत्तीर्ण झाले असून, रायगड जिल्ह्यातील ९७.३५ टक्के विद्यार्थी उत्तीर्ण झाले आहेत. जिल्ह्यातील एकूण ३५ हजार १९५ विद्यार्थ्यांनी नोंदणी केली होती त्यापैकी ३४ हजार ९९१ विद्यार्थी प्रविष्ठ झाले. यामधील ३४ हजार ६७ विद्यार्थी उत्तीर्ण झाले आहेत.

जिल्ह्यातील सर्व उत्तीर्ण विद्यार्थ्यांचे डॉ. किरण पाटील यांनी अभिनंदन केले असून, पुढील भविष्यासाठी शुभेच्छा दिल्या आहेत. दहावीनंतर करिअरच्या दृष्टीने अनेक अभ्यासक्रम असून, विद्यार्थ्यांनी आपल्याला कोणत्या क्षेत्रात करिअर करायचे आहे. त्या दृष्टीने पुढील शिक्षणाची दिशा ठरवावी. ज्या विद्यार्थ्यांना कमी गुण मिळाले आहेत, अशा विद्यार्थ्यांनी खचून न जाता पुढील शिक्षण घेताना जोमाने अभ्यास करावा व यश मिळवावे असे आवाहनही त्यांनी केले आहे.