महामार्ग प्राधिकरण आणि कोकण रेल्वे यांच्यात सामंजस्य करार
| कोकण | प्रतिनिधी |
उत्तराखंडमधील बोगद्याचे काम कोसळल्याने 41 मजूर अडकले होते. त्यामुळे बोगद्यांच्या सुरक्षिततेचा प्रश्न ऐरणीवर आला आहे. यातून मार्ग काढण्यासाठी आता महामार्गावरील बोगद्यांच्या कामात कोकण रेल्वे सहकार्य करणार आहे. तसा सामंजस्य करार राष्ट्रीय महामार्ग प्राधिकरण आणि कोकण रेल्वे कॉर्पोरेशन यांच्यात झाला आहे . भविष्यात उत्तराखंड मधील दुर्घटना पुन्हा घडू नये म्हणून सावध भूमिका घेत राष्ट्रीय महामार्ग विभागाने देशातील सर्व बोगद्यांच्या कामाचे सेफ्टी ऑडिट करण्याचा निर्णय घेतला आहे.
या करारांतर्गत, कोकण रेल्वे महामंडळ हे राष्ट्रीय महामार्ग विभागाच्या प्रकल्पांना सेवा प्रदान करणार आहे. ज्यामध्ये बोगदा बांधकाम आणि उतार स्थिरीकरणाशी संबंधित डिझाइन, रेखाचित्र आणि सुरक्षा पैलूंचा सर्वसमावेशक आढावा समाविष्ट आहे. याखेरीज कोकण रेल्वे बोगद्यांची सुरक्षा तपासणी देखील करणार असून, आवश्यक भासल्यास, उपचारात्मक उपाय सुचविणार आहे. या व्यतिरिक्त कोकण रेल्वे आता महामार्ग अधिकाऱ्यांच्या क्षमता वाढीसाठी प्रशिक्षण कार्यक्रम देखील घेणार आहे. त्यामुळे कोकण रेल्वेच्या यशात आणखी एक मानाचा तुरा रोवला गेला आहे. आता महामार्गांवरील बोगद्यांच्या बांधकामादरम्यानची सुरक्षा आणि उच्च दर्जाच्या मानकांचे पालन सुनिश्चित करण्यासाठी कोकण रेल्वे देशभरातील सर्व 29 निर्माणाधीन बोगद्यांचे सुरक्षा लेखा परीक्षण करणार आहे.