लालपरीला लाभणार बाप्पाची कृपा

गणेशोत्सवासाठी 2310 एसटी बसेस

| मुंबई | प्रतिनिधी |

दहा दिवसांनी साजर्‍या होणार्‍या गणेशोत्सवासाठी एसटी महामंडळ सज्ज झाले आहे. कोकणातील गणेशभक्तांसाठी तब्बल 2310 एसटी बसेस उपलब्ध करुन देण्यात आल्या आहेत.

कोरोना महामारी सुरू झाल्यानंतर जवळपास नंतर दोन वर्षानंतर गणेशोत्सव निर्बंधाशिवाय साजरा होत आहे. मुंबई व परिसरातील अनेक चाकरमानी गणेशोत्सवात गावी जातात. कोकणातील गणेशोत्सवासाठी एसटी महामंडळाने दरवर्षी प्रमाणे तयारी केली आहे.

ग्रुप आरक्षणाला प्रतिसाद

यंदा बाप्पाचे आगमन 31 ऑगस्ट रोजी होणार आहे. महामंडळाकडून 25 ऑगस्ट ते 31 ऑगस्ट या कालावधीत जादा बसेस सोडण्यात येणार आहेत. ग्रुप आरक्षणासाठी मुंबई, ठाणे, पालघर या विभागातून 1268 बसेस असणार आहेत. वैयक्तिक आरक्षण करणार्‍यांसाठी 872 बसेस असणार आहेत. ग्रुप आरक्षणासाठी मुंबई विभागातून 667, पालघर विभागातून 313 आणि ठाणे विभागातून 288 बसेस असणार आहेत.

अतिवृष्टी, दरड कोसळणे किंवा अन्य काही घटना घडल्यास किंवा रेल्वे प्रवासात अडचणी निर्माण झाल्यास कोकणातील प्रमूख स्थानकात 100 अतिरिक्त गाड्यांचं नियोजन केले आहे. त्याचबरोबर, पावसामुळे खराब झालेले रस्ते आणि त्यामुळे टायर पंक्चर होण्याचे प्रमाण वाढण्यासाठी शक्यता लक्षात घेऊन मुंबई-गोवा महामार्गावरील आगार आणि दुरुस्ती पथकामध्ये नेहमीपेक्षा प्रत्येकी किमान 10 अतिरिक्त टायर ठेवण्याची सूचना अधिकार्‍यांनी दिली आहे. त्याशिवाय, घाटात सुरक्षितपणे वाहतूक चालवावी अशी सूचनाही देण्यात आली आहे. गणेशोत्सवानंतर 5 सप्टेंबर ते 11 सप्टेंबर दरम्यान कोकणातून मुंबईसाठीच्या अधिक बस सोडण्यात येणार आहेत.